Abenduaren 5etik 8ra ospatuko den Durangoko Azokaren 49. edizioa dela eta Game Erauntsiko taldeak bertan bere lehen topaketa prestatzea pentsatu du. Azokaren hirugarren eguna, igandea, aprobetxatuko genuke orain arte gure komunitatean fisikoki elkar ezagutzen ez dugunok bateratzeko.

Arratsaldean elkartuko gara tabernaren batean, eta lehendabiziko kontaktu baten ostean proiektuari eta bideojokoei buruzko eztabaida bat ziurtatuta dago! Garagardo batzuk hartu, elkar ezagutu eta proiektua sendotzeko aukera paregabea beraz! Eta ondoren, Durangoko Azokan bueltaxka bat!

zuzeu.eus ataritik hartutako irudia

Izan ere, egun horretan bertan arratsaldeko 17:40tatik hasita 'Game Erauntsia hutsune bat betetzera' aurkezpena aurkeztu behar dugu. Gure proiektuaren historia pixka bat eta bere oinarriak kontatzera goaz: ideia nondik sortu zen, momentu honetan sortu den komunitatea zertan ari den, etorkizunean zertara joan nahi den…

Animatu nola ez bertara azaltzera, tabernan naiz Kabi@ gunean elkar ikusiko dugu! Eta bertaratzeko asmotan bazabiltza, egun hau antolatzen lagun dezakezu. Utzi zure iritzi edo proposamena foroan!!