Minecraft zerbitzaria

Zerbitzariari buruz

Suspekain_ erabiltzailearen iniziatibaz, eta Game Erauntsiaren babesarekin euskarazko hirugarren Minecraft zerbitzaria duzue eskuragai. Hasieran behintzat, aurretik izandako zerbitzarien desberdina izango da: ez dugu Euskal Herri birtualik ez minijokorik izango, mundu ireki bat besterik ez. Helburua konfiantzan eta komunitatean oinarritutako zerbitzaria izatea izango da.

Tarteka, denok elkarrekin jokatzeko, ekitaldiak egingo ditugu. Twitch bidez zuzenean emitituko dira, eta garaiaz abisatuko dizuegu prest egon zaitezten. Esate baterako, hauek dira azken egin ditugun batzuk:

• Irekiera ekitaldia
  • Izena eman duten erabiltzaileei ongi etorria eta lehen azalpenak
  • Errekurtso bila hasiko gara, libreki, lehen materialak lortzeko
  • Etxea eraikitzeko leku bat aukeratuko dugu. 5000 -5000 koordenatuan barruan eta spawnchunketatik aldenduta. Beste kideengandik zentzuko distantzia bat mantenduta
  • Infernua eta Amaierako mundua ez dira aktibatuta egongo
• Infernura txangoa
  • Infernuko dimentsioa aktibatuko da.
  • Infernuko baliabideak libreki eskuratzen hasiko gara.
  • Infernuko biomak eta monumentuak bilatuko ditugu.
• Amaierako dragoiaren aurkako borroka
  • Dragoia hiltzen saiatuko gara
  • Helburua lortuz gero, amaierako monumentuak arakatuko ditugu hegalen bila

Araudia

• Gogoratu Minecraft-eko zerbitzari euskalduna dela, beraz txat-ean derrigorrezkoa da euskaraz hitz egitea.
• Zerbitzariko jokalariak eta administratzaileak errespetatu
• Txata modu egokian erabili: Irainak, spam-a, iruzurrak… debekatuta daude
• Zerbitzariaren eraikuntza irekia da, edozein erabiltzailek hartu dezake parte, beti ere besteen eraikinak errespetatuz.
  • Ezin dira besteen eraikinak suntsitu
  • Ezin dira besteen baliabideak lapurtu
  • Ezin da beste eraikinen gainean eraiki edo eraldatu
• Mod tranpak ezin dira erabili (hegan egitekoak, x-ray edo x-izpiak...)
• Gune komunitario bat egongo da, eta bertan denek eraikitzeko aukera izango dute Administratzaileen jarraibideekin.
• Zerbitzarian jokalarien 3 kategoria daude: Arruntak (Mundua ikusteko baimena soilik), Erregistratuak (Munduan jolasteko baimena) eta Adminak (Erabiltzaileak baneatzeko aukera).
• Baserri automatikoak zein redstone zirkuitu konplexuak gune komunitariotik kanpo egiteko, adminisratzaileen baimena beharko da.
• Ezin da Witherra inbokatu administratzaileen baimenik gabe.
• Aurreko arauetako bat hausteak zigorra jasotzea ekarri dezake: Hitzez atentzioa ematetik, zerbitzaritik betirako kanporatua izateraino
• Arau hauste bat ikusi edo jasan ezkero, idatzi kontaktura noiz/non/nork/zer gertatu den adieraziz eta guk beharrezko ikerketak egin ostean, erabaki bat hartuko dugu.
  • Twitter: Suspekain_
  • Postaz: minecraft[abildua]gamerauntsia.eus

Konektatzeko pausoak

Zerbitzarira sartzeko pausoak ondorengoak dira:

• Araudia irakurri
• Game Erauntsian, eta zerbitzariaren orrialdean izena eman
  • Izena eman orduko, automatikoki, erabiltzaile Arrunta baimena izango duzu. Baimen honekin, zerbitzarian sartu eta bertakoa ikusi dezakezu baina ezin izango duzu ezer editatu. Izena ematerakoan administratzailetako bat zurekin harremanetan jarriko da
  • Administratzaileak galderarenbat egingo dizu, zure asmoa ezagutzeko eta gomendioren bat emango dizu.
  • Behin erabiltzaile Erregistratu kategoria izatean, jolasten hasi zaitezke.
• Ondorengo pausoak darabilzun Minecraft edizioaren arabera zertxobait aldatuko dira, baina funtsean ondorengoa egin behar da:
  • Minecraften 1.18.1 bertsioa aukeratu
  • "Multijokalaria" atalera sartu eta "Gehitu zerbitzaria" botoia sakatu
  • "Zerbitzariaren izena" atalean "Game Erauntsia" idatzi eta "Zerbitzariaren helbidea" atalean "mc.gamerauntsia.eus". Konektatu eta kitto!