Escape from Tarkov: FPS ultra errealista

Haritz Odriozola | 2019/06/16 11:00 Analisiak



First Person Shooter (FPS) munduan badira jolas batzuk errealitatea ahalik eta hein handienean isladatzen saiatzen direnak. Jolas hauek merkatu nahiko txikia eta espezifikoa dute, bideojokoen mundurako “helduak” direnen eta PC-ko erabiltzeek osatzen dutena. Jolas oso konplexuak izaten dira, zailtasun oso handikoak eta askotan talde lana ezinbestekoa dena. Horien artean Escape From Tarkov (EFT) aurkitzen da. San Petersburgo (Errusia) hirian aurkitzen den Battlestate Games garatzaileen proiektua da EFT, beraien lehen joko “handia” esan daitekeena. Online soilik jolasten den, RPG-etan bezala jokalariaren progresio sistema duen eta erabiliko dugu ekipazio guztia jolas barruko diruarekin erosi beharra (Disparatuko den bala bakoitza edota sendatzeko erabiliko dugun botikin bakoitza adibidez) ditu bereizgarriak.

 

 

Jolasa early-access egoeran dago oraindik eta hainbat bertsio ezberdin (Bakoitza prezio ezberdinarekin) saltzen dira, merkeenetik garestienera: Standard edizioa, Left Behind edizioa, Prepare For Escape edizioa eta Edge of Darkness edizio limitatua. Edizio bakoitzak hainbat ezaugarri ezberdin ditu, normala den bezala edizio garestienak ezaugarri onenak dituelarik.

 

Atal teknikoa

 

Jolasaren garapena Unity motor grafikoan dago egina, 5. edizioan hain zuzen ere. Merkatuan dauden FPS nagusienekin konparatuz gero, maila altuko grafikoak dituela esan daiteke, baina benetan besteengan gailentzen duena eszenatokien errealitate sentsazioan da. Zaila da azaltzeko azkeneko ezaugarri hau baina askotan jolas batek nahiz eta grafiko oso onak izan, eszenatokiaren diseinu irizpideak edo diseinu artistikoa direla eta, ez da batere errealista sentitzen. Nabaria izaten da zabiltzan mundu hori artifizialki sortutakoa dela. Escape From Tarkov-ek arazo hori oso ondo lortzen du konpontzea, izan ere mapen diseinua oso erreala sentitzeaz gain, seguraski Quixel Megaescan fotogrametriako (Bizitza errealeko objektuak laser bidez eskaneatu eta 3D objektuak bihurtzea) teknologiari esker jolasean murgiltzea asko errazten da. Horrez gain, mapak oso aberatsak dira detaileei dagokionez, The Lab edo Interchange bezalako mapak adierazgarri izanik. Baina kalitate bikain guzti honek prezio bat dauka eta oraindik jolasa ez dago behar bezala optimizatuta, stuttering efektua nahiko ohikoak izanik.

 

Soinuaren diseinua ere nahiko ona da, esfortzu handia egiten dute Battlestate Games taldeko garatzaileek arma errealak tirokatu bitartean soinuak grabatu eta ahalik eta era errealenean jolasean soinuak entzun daitezen. Hala ere, hainbat arazo izan dituzte soinuaren direkzionamenduari dagokionez, askotan etsaien posizioarekin konfusio handiak sortzen direlarik.

 

 

Hala ere arazo guzti hauek laister konpontzea pentsatzen dira, 0.12 bertsioaren irteerarekin hain zuzen ere. Bertsio honetan Unity 2018 bertsiora pasako da, honela optimizazioan aurrerapen handia espero delarik eta soinuari dagokionez ere akatsak zuzenduko direnaren intentzioarekin. Horiez gain gertuerazko VoIP (Ahotsezko komunikazio) sistema bat ere gehitzea pentsatua dago beste hainbat ezaugarriren artean.

 

Jolasaren testuingurua


Jolasak 2028. urtean San Petersburgo inguruan Errusiar Federazioak eratutako gune ekonomiko berezian kokatzen gaitu, Norvinsk izenekoa eta Tarkov duena kapitala. Europa eta Errusia artean kokatuz gune estrategiko oso baliotsua egiten du eta herrialde eta enpresa askok legaltasun maila gutxiko operazio eta gestioak egitera erakarri dituena. Norvinsk-eko ustelkeria kasuen gorakadak konflikto armatu bat eta bi mugen itxiera ekarri du, bertan bizi den populazioa erbestera ihes egiten duelarik. Norvinsk-en beste hainbaten artean, Terra Group izeneko multinazional batek hainbat instalazio ditu, bertan legaltasunetik kanpoko hainbat esperimentu, ikerketa eta garapen gauzatzen zituelarik eta konfliktoaren ondorioz guzti honen kontrola galdu duelarik. Egoera honetan, 3 fakzio geratzen dira Norvinsk-eko kontrola izan nahian:

 

  • SCAV (Scavenger): Norvinsk-etik ihes egin ez zuten hainbat hiritar batu, hainbat arma eskuratu eta milizia txiki osatuz beraien lurraldearen kontrola berreskuratzeko intentzio dutelarik.

 

  • USEC (United Security): Terra Group-ek bere instalakuntzen kontrola galtzean USEC izeneko talde armatu pribatu kontratatzen du bere instalazioetan gordetzen diren datu eta egindako aktibitatearen detaileak inork argitaratu ez ditzan.

 

  • BEAR (Battle Encounter Assault Regiment): Terra Group-ek egindako esperimentu arriskutsuen berri du Errusiar ejertzituak eta honen inguruan informazioa lortzeko Errusiar ejertzitoko soldadu ohiek osatutako BEAR talde armatu pribatua kontratatzen du.

 

 

 

Menua eta inbentario orokorra

 

Lehen aldiz jolasean sartzean USEC eta BEAR fakzioen artean aukeratzeko eskatuko digute. Momentuz bi fakzioen artean dagoen diferentzia bakarra uniformea eta soldaduak hitze egiten duen hizkuntza da, USEC-en ingelesa eta BEAR-en errusiera. Etorkizunean ezberdintasun gehiago egongo dira bi fakzioen artean, adibidez saltzaile ezberdinekin fakzio bakoitzak harreman hobea izango du, honela objektu zerrenda handiago batera sarrera izanik.

 

Behin parte izango garen fakzioa aukeratuta, gure inbentario orokorra izango dugu ikusgai. Escape From Tarkov-en objektu guztiek espazio bat okupatzen dute, beraien tamaina eta formaren araberakoa, eta gure pertsonaiaren zein inbentario orokorrean espazio mugatua dugu. Inbentario orokorraren tamaina jolasaren edizioaren araberakoa da. Ediziorik sinpleenean (Standard edizioa) adibidez 10x26 gelaxkakoa da, aldiz ediziorik garestienean (Edge Of Darkness) 10x66 gelaxkakoa da. Momentuz inbentario orokorraren tamaina ezin da handitu, baina garatzaileek agindu dute jolasa early-access egoeratik ateratakoan jada egongo dela moduren bat (Momentuz zehaztu gabekoa) edozeinek tamaina handitu ahal izan dezan.

 

 

Inbentario orokorrean hasiera batean hainbat objektu izango ditugu (Hauek ere erositako edizioaren araberakoak), jolasaren hasieran arma zein zeinbat tresna izan ditzagun gure abentura martxan jartzeko. Horrez gain inbentario orokorrak partida bakoitzetik ateratako objektuak gordetzeko balio izango digu. Edizio baxuenetako bat izanez gero, inbentario orokorraren gestio ia beste jolas bat bihurtu daiteke, Tetris jolas mitikoari ohore egiten dion modukoa.

 

Saltzaileak eta misioak

 

Escape From Tarkov-en 6 saltzaile ditugu guztira, misioak ere emateaz arduratuko direnak. Misio hauek saltzaile bakoitzarekin daukagun erreputazioa igoko digute, honela puntu kantitate bat lortzean eta gastu jakin bat egitean saltzaile horren hurrengo erlazio mailara igoz. Igotzen garen maila bakoitzeko erosi ahal diren arma, munizio, ekipazio, etab. berriak desblokeatuko zaizkigu.

 

 

Saltzaile hauek izateaz gain Flea Market izeneko atal bat daukagu, azken finean jokalarien arteko merkatu bat bezala funtzionatzen duena. Saltzaileek saltzen ez duten edo oraindik erosi ezin duzun objekturen bat behar baduzu eta partida barruan bilatzea ez baduzu nahi, merkatu honetara jotzea da onena, hori bai prezioak nahiko altuak izan ohi dira.

 

Misioei dagokionez, gure pertsonaiaren maila igoz nahiz beste misioak eginez irekitzen joango zaizkigu misio berriak. Barietate askoko misioak daude: Mapa jakin batean X jokalari edo NPC akatu, objektu bat lortzeko dagoen logelarako giltza aurkitu ondoren berau hartu eta partidatik ihes egitea, partidetan objektu konkretu batzuk aurkitu eta beraiek dagokion saltzaileari entregatzea, arma jakin batzuk era konkretu batean modifikatu eta saltzaileari entregatu, etab.

 

Misio hainbatek gure trebetasunari egingo diote erronka, baina beste batzuetarako zortearen menpean izango gara, izan ere giltza edo objektu konkretu bat partida barruan aurkitu ahal izatea ausazkoa baita. Halere, ez da aspergarria egiten behin eta berriro errepikatu behar izatea partida bakoitza objektu hori lortu arte, izan ere askotan ekipazioa eta pertsonaiaren maila igotzeko esperientzia puntuak lortzeko bidea izango baitugu.

 

 

 

Armen modifikazioa eta ekipazioa

 

Hainbat arma ezberdin ditugu eskuragarri, Makarov PM edo Glock 17 bezalako pistola sinpleetatik, AK-74N edo M4A1 bezalako eraso errifletara edota Mosin edo SV-98 bezalako frankotiratzaile errifletara. Jolaseko armak 7 taldetan banatzen direla esan dezakegu:

  • Pistolak
  • Subfusilak
  • Eskopetak
  • Eraso karabinak
  • Eraso errifleak
  • Tirogile errifleak
  • Frankotiratzaile errifleak

 

Nahiz eta 7 talde hauetan aurkitzen diren armekin (58 guztira) nahiko aniztasun daukagun jolasean, jolas honen benetako berezitasuna eta mamia arma horiek modifikatu ahal izatean datza. Arma bakoitzari gehigarri jakin batzuek soilik gehitu daitezke (bizitza erreal bateragarriak direnak soilik), hala nola kanoia bezalako atal ezinbestekoetatik hasita, isilgailu edota helduleku taktikoetara. Aurretik aipatu diren arma horiekin lortu daitezkeen konbinazio ezberdinak milaka eta milaka kontatu daitezke. Noski pentsatu daitekeen bezala, gure armari gehitzen diogun gailu bakoitzak eragina izango du berau erabiltzeko orduan, tiro egin osteko atzerakada jaitsiz, automatikoan disparatzean kontrolatzea errazago eginez, kargadore handiagoak izanez, etab.

 

 

Horiez gain jolasean zehar granadak erabiltzea nahi izanez gero, leherketa, flash edota ke motakoak, partida barruan aurkitzeaz gain erosi ahal izango dira saltzaileen dendetan. Munizioa ere erosi egin beharko da, arma bakoitzak munizio kalibre jakin bat erabiltzen duelarik. Kalibre bakoitzaren barnean bala mota ezberdinak egongo dira, prezio ezberdina izanik, baina ezaugarriak ere bai. Bala mota bakoitza subsonikoa edo supersonikoa izan daiteke. Horrez gain haragian zein armaduran duen inpaktu kantitatea, inpaktua izan ostean bala zatikatzeko duen probabilitatea edota abiadura bezalako ezaugarriak izango ditu. Beraz mundu oso bat izango dugu munizio egokiena aukeratzeko orduan ere.

 

Baina jolasean tiro egitea ez da guztia eta beste hainbesteko garrantzia dauka bizirik irauteak. Horregatik garrantzitsua izango da babesak erostea, hau da balen aurkako txalekoa edo kaskoak erostea. Hauek ere mota askotakoak daude, bakoitzak kantitate ezberdinean babesten gaituelarik, eta balen inpaktuekin apurtzen joaten direlarik. Horiez gain, txaleko taktikoak (kargadoreak, granadak etab. emateko), motxilak (looteatutako gauzak biltzeko), aurikular taktikoak, betaurrekoak, etab. erosi ahalko dira.

 

Partiden mekanika: Raid sistema

 

Partida batera sartu aurretik lehenik SCAV (Ausazko ekipazioa eta IA adiskidea) edo PMC (Gure pertsonaia) izango garen aukeratu beharko dugu. SCAV mota, partida baten amaieratik berriz jokatzera 10 minutuko tartea itxoitera derrigortzen digu, jendeak mota hau abusatu ez dezan. PMC-an berriz nahi bezain azkar sartu ahal izango gara partida berri batera.

 

 

Behin fakzioa aukeratuta, ze mapatan jolastu nahi dugun eta dauden 2 orduetako bat aukeratu beharko ditugu. Tarkov-en orduaren eboluzioa jarraia (Abiadura azkarragoan ordea) da, beraz posible da Raid bat arratsaldeko 6etan (Jolaseko ordua) sartzen bagara partidaren hasiera argi izatea eta amaieran berriz ilun. Momentuz 6 mapa daude erabilgarri, batzuk gertuko borrokakoak izanik (Factory eta The Lab), erdi distantziako bat (Customs), distantzia luzeko bat (Woods) eta bi guztien nahasketa bat izanik (Interchange eta Shoreline). Etorkizunean mapa guztiak jolasteko moduan izateaz gain beraiek konektatuta egotea da garatzaileen intentzioa, hala ere benetan lan zaila izango dute hau gauzatzea, mapa izugarri handia bihur baitaiteke.

 

 

Hauek aukeratuta PMC kasuan soilik beste aukera bat izango dugu, Raid-era sartzera goazen objektuen asegurua egitea hain zuen ere. Diru kantitate baten truke gure objektuak aseguratu ahalko ditugu, hau da objektu horiek partidatik ateratzen ez badira (Guk edo beste norbaitek aterata) denbora baten ostean, bizitza errealeko 24-48 ordu tartean, itzuli egingo zaizkigu. Bakoitzak erabaki behar izaten du ze puntutaraino ondo etorriko zaion asegurua egitea, normalean ekipazio merkearekin egiten ez den arren. Partidara sartu aurrekoa azken aukera norbaitekin taldean jokatu nahi dugun aukeratzeko menu txiki bat izango dugu.

 

 

Behin partidara sartu ostean eta mapako toki jakin batzuetako batean spawn egin ostean, aurrera ekin beharko dugu. Halere kontuz ibili beharko gara izan ere beste jokalariak ibil baitaitezke gertu. Lagunen batekin sartu bazara partidara batera egingo duzue spawn, baina inoiz ez duzu lagunaren pertsonaiaren gainean markagailurik edo ikusiko adieraziko dizunik zure laguna dela. Bere itxura, daraman ekipazioa edo ahots bidezko komunikazioaz baliatu beharko da nahi gabe adiskidea tirokatu ez dezazun.

 

Beti izango duzu partidan informazioa partidatik irtetzeko lekuak zein tokatu zaizkizun (Spawn-aren arabera izaten dira) eta zenbat denbora falta zaizun irteeraraino iristeko. Denbora amaitzen bazaizu irteerara iritsi baino lehen, partidan zeneuzkan gauza guztiak galduko dituzu. Halere ez da izaten faktore kritikoa inolaz ere, aski denbora izaten baita mapan zehar bueltaka ibili eta irteera batera iristeko.

 

Partida barruan misioak bete beharra izateaz gain, hainbat toki konkretutan dauden kutxa, armairu, etab. Begiratu ohi izaten da, objektuak looteatzeko. Hainbat mapetako toki batzuetara gainera giltza edo txartel konkretu batzuk erabiliz soilik sar daiteke, eta giltza hauek soinean izan beharko ditugu erabili nahi baditugu. Hidratazioaz ere ez gara ahaztu beharko, denboran zehar jaitsiz joango baita.

 

 

Behin partida batetik irtetzea lortutakoan bertan lortu ditugun objektuak gure inbentario nagusira pasa ahal izango ditugu. SCAV-en kasuan beti ere tokia badugu, izan ere momentuan pasatzen ez badugu galdu egingo baitira gauzak. Barregarria iruditu daiteke inbentario nagusian tokirik ez izatea, baina jolasaren edizio baxuenetako bat izanez gero arazo estra bat izan daiteke espazioaren kudeaketa.

 

Osasun sistema eta sendaketa

 

Escape From Tarkov-ek beste FPS gehienetan ez bezala osasun eta sendaketa sistema oso konplexua dauka. Gorputza 7 zatitan banatzen da: Burua, torax-a, sabela eta azkenik beso eta hanka bana. Bakoitzak osasun kantitate bat dauka eta 0-ra jaitsiz gero gorputzeko atal hori egoera “kritikoan” daukagula esan daiteke.

 

 

  • Burua eta torax-aren kasuan egoera honetara iristen bagara hil egingo gara zuzenean. Soilik odolustu baten ondorioz egoera honetara iristen bagara bizirik iraun ahalko dugu, baina edozein kalte txiki jasotzen dugularik heriotza izango da.
  • Besoetan egoera kritikora iritsi gabe hezur haustura gertatu daiteke, arma kargatzea, apuntatzea eta beste hainbat ekintzatan penalizazioak izanik. Egoera kritikora iritsiz gero, aurreko guztiaz gain, aparte jasotako kalteak gorputz guztira era arinean eragingo du.
  • Sabelean hausturak gertatuz gero, deshidratazioa eta energia galera izugarri handituko dira. Egoera kritikora iritsiz gero aurrekoaz gain aparte jasotako kalteak gorputz osoan era handi batean eragingo du.
  • Hanketan hezur haustura batek mugikortasuna modu handi baten mugatuko digu. Egoera kritikora iritsiz gero aurrekoaz gain aparte jasotako kalteak gorputzean eragingo du.

 

Gorputzeko atal bakoitzaren osasun kantitatea berreskuratu ahalko dugu beti ere egoera kritikoan ez bagaude, hori bai, sendaketa ekipazioa erabili beharko dugu eta hau gastatu egiten da. Hainbat sendaketa ekipazio ezberdin daude, sinpleenetik eta gutxien irauten duenetik hasita botikin handietaraino. Hezur hausturak ferula bat aplikatuz arindu daitezkee, eta hainbat eragin negatibo berriz analgesikoak edo morfina hartuz momentu baterako ekidin daitezke.

 

Sendatu bitartean gure pertsonaiak berau egiten ari den animazio bat gauzatuko du, beraz kontuz ibili beharra dago noiz sendatzen den bat, izan ere sendatu bitartean ezin baita logikoa den bezala tirorik egin. Behin Raid batetik ateratakoan osasuna guztiz berreskuratzen da automatikoki hurrengo Raid-era sartu aurretik.

 

Pertsonaiaren ezaugarri sistema

 

Pertsonaiaren garapen sistema bat ezarria du Escape From Tarkov-ek, RPG-etan ohikoa izaten den bezalakoa. Lasterka ibiltzeak adibidez erresistentzia ezaugarriaren maila igoko digu, aldiz arma batekin etsaiak akatzeak arma horren maisutasun ezaugarria igoko du. Ezaugarri bakoitza igotzeak bonifikazio bereziak ematen dizkigu, hala nola, energia kantitatea handiagoa izatea, energia berreskurapen azkarragoa, hezur hausketa probabilitatea jaitsi, atzerapenaren kontrol hobeagoa eman eta beste asko. Momentuz 20-30 ezaugarri soilik daude aktibatuta jolasean ibili ahala garatu ahal izateko, baina etorkizunean kantitate horren bikoitza gutxienez izango dira.

 

 

Escape From Tarkov anbizio oso handiko proiektu bat da, estudio txiki/ertain batek hartu duena esku artean. Publikoaren aldetik harrera oso ona izan du jolasak, baina argi dago inoiz ez duela Battlefield edo Call Of Duty bezalako jolasek daukaten publiko kantitatea izango. Battlestate Games-ek agindu dituen ezaugarri guztiak betetzea oso zaila izango da, asko teknikoki oso zailak, ia ezinezkoa ez esateagatik, baitira. Baina agindutakoaren zati handi bat betetzen badute, eta momentuz bide onetik doaz, FPS ultra errealistak gustuko ditugun publiko txiki honentzat kultuzko jolas bat bihurtu daiteke.

 

Escape From Tarkov mugimenduan ikusi nahi baduzue, jarraian uzten dizuet nire kanalean aurki daitekeen gameplay bat. Bertan jolasaren oinarrien laburpen motz bat egiten dut baita ere.

 

Game Erauntsia facebook


Iruzkinak

Mesedez, sartu iruzkina utzi ahal izateko.

171
Kide

0
Jolasten

11
Online

Azken erantzunak

Lander Unzueta Oct. 3, 2019, 11:53 a.m.

Aupa, eskerrik asko testua argitaratzearren! Azkenaldian denbora faltagatik analisiak idazteari utzi izan diot, baina ea pixkanaka-pixkanaka berriz e…
Metroidvania guztien erregea - Hollow Knight

Urdinberde Feb. 10, 2019, 7:47 p.m.

eta astirik baduzue hyrule warriors, tingles rupee land, tingles baloon trip of love, links crossbow training eta navi trckers. Eta batenbat ahaztu…
Zeldaren kondaira euskaratu dugu

Urdinberde Feb. 10, 2019, 7:41 p.m.

oso ona, orain itzuli zelda 2: links advesnture, zelda a link to the past, zelda link awekenin, zelda orocle ages eta season, zelda: ocarina of time,…
Zeldaren kondaira euskaratu dugu

Igor Okina Feb. 3, 2019, 2:58 p.m.

Estrategia zale bezala, esan biharra daukat zerrenda horretako ia bat be ez jatela interesatzen (akaso Cyberpunk 2077, baña ez dot uste 2019 irtengo …
Onena etortzear dago: eta 2019an zer?