Run and gun zailaren bigarren atala garatzen dabiltza; gainera, Master System kontsola klasikorako Mighty Cuphead Adventure iragarri dute.

Studio MDHR ezagunak Cuphead unibertsoko bi proiektu dauzka esku artean.

Summer Game Fest zuzenekoan aditzera eman dutenez, lehen proiektua Cuphead 2 izango litzateke. Xehetasun handirik eskaini gabe, eskuz marraztutako akzio eta plataforma abentura izango dela adierazi dute; hau da, 2017. urteko Cuphead originalaren oinarriak mantentzen dituen abentura prestatzen dabiltza.

Bigarren proiektua antzeko zerbait da, baina bereziagoa dela esan daiteke: Mighty Cuphead Adventure. Egungo plataformetan estreinatuko den akzio eta plataforma abentura bada ere, retro kontsola batentzat garatzen dabiltza bereziki: Sega-ren Master System klasikoarentzako bertsio fisikoa kaleratuko dute arduradunek.

Jokagarritasuna ohikoa izango dela ikus daiteke iragarpen bideoan: Cuphead eta lagunak kontrolatuz bi dimentsioko erronkak biziko ditugu, saltoka eta tiroka maila desberdinak nahiz buruzagi erraldoiak gainditu behar izanik.

Bi proiektuak kaleratze datarik gabe iragarri dituzte Studio MDHRkoek.