Final Fantasy VII Revelation apirilaren 8an merkaturatuko da egungo kontsoletan eta ordenagailuetan

Final Fantasy VII Revelation 2027ko apirilaren 8an estreinatuko dela iragarri du Square Enix enpresak. PCan zein PlayStation 5, Switch 2 eta Xbox Series kontsoletan argitaratuko da egun berean.

State of Play zuzenekoaren azken iragarpena izan da FFrena. Horrela, berregiteen trilogiako hirugarren eta azken atala izango da Revelation, 1997. urtean estreinatutako klasikoaren istorioari amaiera emanez, eta, aldi berean, aldatuz. Cloud, Tifa, Barret, Cid, Cait Sith, Vincent eta gainerako protagonista guztiak elkartuko dira oraingoan, mundu irekian zehar Sephirothen mehatxuari aurre egiteko.

Zutabe nagusietako bat, hain zuzen, mundu ireki hori izango da. Askatasun osoz zeharkatu ahalko dugu Highwind ontzira igota, edozein unetan bertatik salto eginez, misio nagusiak zein bigarren mailakoak gainditzeko. Denbora errealeko borrokak, mailaz aldatzeko FITS ezaugarria, arma buruzagi boteretsuak eta Final Fantasy VIIren unibertsoko beste istorioetan agertutako pertsonaiak azalduko dira berregitearen amaieran.

Berritasun guztiak aditzera emateko bideo luzea prestatu dute Square Enixekoek, borroketan, esplorazioan nahiz narratiban sakonduz:

Apirilaren 8an iritsiko da PC, PS5, Switch 2 eta Xbox Series plataformetara Final Fantasy VII Revelation. Berregiteen aurreko atalak ere aipatutako gailuetan goza daitezke: horri lotuta, hiru bideojokoak batzen dituen Final Fantasy VII Remake Series Trilogy Edition bilduma argitaratuko dute plataforma guztietan.

Demoa FF Resonance-rentzat

Zazpigarrena ez da State of Playtik igaro den Final Fantasy bakarra izan. Urriaren 22an kaleratu behar den Final Fantasy Resonancen bideo berria ere ikusi dugu, gaur bertan demoa estreinatuko duela ezagutzera emateko.

Mugikorretarako Final Fantasy Brave Exvius-en PC, PS5, Switch 2, Switch eta Xbox Series gailuetarako moldatutako bertsioa da Resonance: HD-2D estetikaz baliatuta, grafiko ederrak zein berezko istorioa proposatuko ditu plataformotan.