Arguyuan irratsaioan 2024ko azken estreinaldiak errepasatu ditu Eider Zabalegi bideojokozaleak.

Abenduko lehen ostirala igarota, Eider ‘Il4rgi’ Zabalegiren irratsaio berria daukagu Game Erauntsian: ohi bezala, Oiartzun Irratiko Arguyuan saioan daukan txokotik pasa da bideojokoen azken estreinaldiei buruz hitz egiteko.

Urtea bukatzear bada ere, argitalpen interesgarriak jasoko ditugu. Asko ezagunak dira dagoeneko, baina filme ezagunetan oinarritutako bideojoko handiak ere datoz.

The Game Awars sariak ere aipatu ditu Il4rgik: abenduaren 13an ezagutuko ditugu irabazleak, baita ekitaldian aurkeztutako bideojoko berriak ere. Bitartean, bideojokozale adituaren hautagaiak jakiteko aukera daukagu.

Saiora ekarritako lehen estreinaldia Il4rgiren 2024ko jokorik kutunenetakoa da. Lorelei and the Laser Eyes maiatzean iritsi zen PC eta Switch gailuetara, baina abendu honetan PlayStation 5 zein PlayStation 4 kontsoletako bertsioak argitaratu ditu Simogo estudioak. Puzzleak ardatz dituen abentura bitxiak sekulako balorazioak lortu ditu prentsaren zein zaleen aldetik; Eiderrek berak ere gauza onak baino ez zituen esan Gamelu katean argitaratutako bideoanalisian.

The Thaumaturge CRPG abentura, berriz, martxoan ailegatu zen PCra; orain, baina, PS5 eta Xbox Series kontsoletako port-ak heldu zaizkigu. 20. mende hasierako Varsoviara eramango gaitu Fool’s Theory estudioaren lanak, ez gure errealitatekora, ordea: deabruz eta espirituz betetako hiria bisitatuko dugu hizketaldiek, erabakiek eta ikerketek garrantzia handia duten lurraldean. Borrokentzako lekua ere egongo da: txandakakoena, zehazki.

Indiana Jones and the Great Circle iritsi zaigu azkenik Xbox Seriesera eta PCra —2025ean PS5ean ikusiko dugu—: urte bukaerako azken estreinaldi handia. MachineGames taldeak Wolfenstein sagarekin ikasitakoa hartu du Indy arkeologoaren abentura berria eratzeko. Esplorazioa, puzzleak eta isilpea uztartzen ditu, akzioarekin pixkat nahasteko, zaleen arabera Dishonored edo Hitman bezalako lanen elementuak bereganatzen dituen titulu dibertigarria eratzeko: Steam plataforman balorazio oso positiboak lortu ditu.

Errealitate birtualera bideratutako bideojokoaren bukatu du Il4rgik… eta hau ere zinemako frankizia maitatu batea oinarritutakoa da. Abenduaren 19an Alien: Rogue Incursion kaleratuko du Survios taldeak: akzioa eta beldurra xenoformoen erronkarekin elkartzen duen abentura ikusgarria. Isilpea zein armak erabili beharko ditugu alien beldurgarriei aurre egiteko: PCan zein PS5ean joka dezakegu, baina VR kaskoak nahitaezkoak dira.