Ekainaren 5ean The Legend of Zelda: The Wind Waker, SoulCalibur II eta F-Zero GX maitatuak jasoko ditu Nintendo Switch Online + Expansion Pack zerbitzuak.

Nintendo Switch Online harpidetzak Nintendo GameCube kontsola gehituko du bere gailu birtualen katalogora. Switch 2 berriak mugitu ahalko ditu 128 bits-eko gailuaren bideojokoak.

Kontsola birtualaren aurreko bideojokoekin egin bezala, GameCubeko jokoak pixkanaka-pixkanaka ikusiko ditugu Switch 2aren harpidetza zerbitzuan. Ekainaren 5ean jasoko ditugu lehenengoak: hiru, zehazki.

The Legend of Zelda: The Wind Waker izan da, zalantzarik gabe, izar nagusia: Link heroiaren itsasoko cel-shading abentura sagako onenetarikoa da. Hala eta guztiz ere, ez dugu Wii Uan kaleratutako HD bertsioan jokatuko, GCko originalean baizik.

SoulCalibur II borroka jokoa da iragarritako beste bat. Namco-ren frankizia beteranoaren obrarik maitatuena dugu, dozenaka modalitate eskainita. Ez hori bakarrik, Link ere ikusiko dugu hemen, GCko bertsioan berarekin joka baikenezakeen.

Bukatzeko, Nintendok Sega-rekin elkarlanean garatutako F-Zero GX maisulana iritsiko da Switch 2ra. Dozenaka espazio ontzi, zirkuitu mordoa, istorio modalitate ikaragarria, gure ontziak sortzeko editorea eta multijokalari bizkorra proposatuko dizkigu.

Etorkizunean gehituko dituzten bideojokoak aditzera eman dituzten Switch 2aren Direct aurkezpenean: Super Mario Sunshine, Luigi’s Mansion, Pokémon XD, Super Mario Strikers, Chibi-Robo eta Fire Emblem: Path of Radiance helduko dira gailu hibrido berrira.

Aipatutako guztiek kontsola birtualaren ohiko ezaugarriak jasoko dituzte: edonoiz eta edonon partida gordetzea edo kontrolak nahi bezala aldatzea ahalbidetuko digute. Onena, baina, multijokalariari lotuta dator: tokiko multijokalaria duten tituluetan sare bidez jokatu ahalko dugu.

Ganoraz jokatzeko agintea prestatu dute, bukatzeko: GCaren eguneratutako mandoa erosi ahalko dugu Switcharekin erabiltzeko.

Harpidetzarik garestienean aurkituko ditugu GameCubeko tituluak: Nintendo Switch Online + Expansion Pack zerbitzua ordaindu beharko dugu, Switch 2 kontsolan, joko hauek eskuratzeko. Aipatu modura, ekainaren 5ean jarriko dituzte abian, kontsola berriaren merkaturatzearekin batera.