One Piece: Grand Gourmet lastotxapelen tripulazioa sukaldari lanetan jartzera dator

One Piece: Grand Gourmet Tokyo Game Show azokatik igaro da, Monkey D. Luffy pirataren eta bere tripulazioaren abentura berriko gakoak zehazteko. Borrokak eta bestelakoak alboratuta, sukaldaritza eta kudeaketa lanak elkartuko dituen jokoa prestatzen dabiltza Bandai Namco-koak.

Horretarako, Kairosoft estudioarekin elkartu dira. Game Dev Story bezalakoen garatzaileek ohiko oinarriak eta mekanikak berreskuratuko dituzte, oraingoan Eiichiro Oda mangakak eratutako unibertsoan girotzeko. Baratie 2 jatetxea kudeatzea izango da helburua. Manganimearen zaleek ondo ezagutuko dute, Sanji pirataren lantoki ohia izanik: eguneratutako bertsioa irekita, lastotxapelak bertan lanean jarriko dira, bezeroak artatuz eta platerak prestatuz.

Langile hasiberriaren rola jokatuta, kozinatzen, osagaiak biltzen eta kudeatzen nahiz jatetxea bera zaintzen ariko gara. Langileak lortzea eta hauen abileziak hobetzea ezinbestekoa izango da handitzen eta hedatzen doan jatetxeak funtzioaraztea lortzeko. Noski, gure taldeko sukaldariak nahiz jatetxera hurreratzen diren bezeroen artean One Piece munduko pertsonaia ezagunak ikusiko ditugu: Bizarzuri, Shanks, Buggy, Boa Hancock eta beste 400 aurpegi inguru igaroko dira Baratie 2tik.

Pertsonalizazioa izango da ardatzetako bat: jatetxea nahi bezala atonduta eta antolatuta, gure menuak apaintzeko aukera edukiko dugu. Minijokoetarako tartea ere egongo da, tripulazioa zein langileak entrenatzeko eta indartzeko probekin, baita beste pirata taldeen aurkako borrokekin ere.

Aspalditik ez dugula One Pieceren bideojoko handi bat ikusten; Grand Gourmet ez da izango askok bilatzen dutena, baina Kairosoften lanek milaka pertsona harrapatzea lortu dutela ezagututa, Luffyren eta lagunen abentura xumeagoaren baina dibertigarriagoaren aurrean egon gaitezke.

Laster helduko zaigu, urriaren 23an estreinatuko baita. PC, Switch 2, Switch eta Android zein iOS gailu mugikorretan kaleratuko da One Piece: Grand Gourmet.