Split Fiction, Tony Hawk’s Pro Skater 3+4, Street Fighter 6 edo Yakuza 0 iritsiko dira, besteak beste, Nintendo gailu berrira.

Nintendok zein kanpoko enpresek bideojoko berri ugari aurkeztu dituzte Switch 2aren aurkezpen ekitaldian. Espero bezala, hirugarrenen enpresek Switch originalean argitaratu gabe geratu diren tituluak kontsola berrira eramateko aprobetxatuko dute: Elden Ring, Final Fantasy VII Remake, Cyberpunk 2077 edo Hades 2 Switch 2an jokatu ahalko dira.

Aipatutako asko Nintendoren gailurako port hutsak izango dira; halere, badira berritasun interesgarriak ekarriko dituzten hainbat obra.

Elden Ring arrakastatsuak, esaterako, Tarnished Edition bertsioa kaleratuko du Switch 2an. Shadow of the Erdtree espantsioarekin batera iristeaz gain, armadura eta arma berri batzuk gehituko ditu; gainera, Torrent zaldiarentzako itxurak ere agintzen dituzte FromSoftware-koek. Baieztatu dutenez, berrikuntza guztiak gainerako bertsioetan ere ikusiko ditugu. 2025ean estreinatuko da Switch 2an.

Cyberpunk 2077: Ultimate Edition prestatzen ari da CD Projekt Red poloniarra, eta hardware ezaugarri bereziak aprobetxatzeko asmoa daukate. Joy-con aginteen mugimendu kontrolekin borroketan parte hartu ahalko dugula diote, eta giroskopioarekin tiroketa zehatzagoak ikusiko ditugu. Phantom Liberty espantsioarekin batera iritsiko da ekainaren 5ean.

Final Fantasy VII Remake Intergrade saritua da Switch 2an plazaratuko duten beste titulu arrakastatsuetako bat. Argitaratze datarik gabe, FF VII klasikoaren berregitearen lehen atala dugu; Yuffie protagonista duen eduki gehigarrirekin batera etorriko da.

Yakuza 0 Director’s Cut dugu beste iragarpenetako bat. Ryu Ga Gotoku Studio-ren jokorik borobilenetakoa Switch 2ra iritsiko da berritasunekin: zinematikak zein joko motak gehituko dizkiote, multijokalari aukerak barne. Ekainaren 5ean estreinatuko da Kazuma Kiryu eta Goro Majima bikotearen abentura Switch 2an.

IO Interactive taldeak bi bideojoko aurkeztu ditu Switcharen oinordekoarentzat. Alde batetik, Hitman World of Assassination – Signature Edition-ek azken hiru Hitman tituluak bilduko ditu ekainean; bestetik, aspaldi iragarritako James Bond agentearen Project 007 Switch 2an argitaratuko dutela baieztatu du IOk.

Oraindik garapen prozesuan murgilduta dagoen Hades II agertu da aurkezpenean. Supergiant Games-ek iaz estreinatu zuen aurretiazko sarbidean ordenagailuetarako, baina 1.0 bertsioa Switch 2 zein Switch kontsoletan jokatu ahalko dugu. Kaleratze datarik gabe jarraitzen du.

Tony Hawk’s Pro Skater 3 + 4 berregiteen bilduma udan estreinatuko da S2an; Street Fighter 6 ekainaren 5ean ikusiko dugu; oraintsu argitaratutako Split Fiction bikaina ere kontsola berriarekin batera estreinatuko da.

Gehiago: Hogwarts Legacy, Daemon X Machina: Titanic Scion, Sid Meier’s Civilization VII, Borderlands 4, Bravely Default: Flying Fairy HD Remaster, Star Wars Outlaws, Professor Layton and the New World of Steam, Shadow Labyrinth, Arcade Archives 2 Ridge Racer, REANIMAL, Sonic X Shadow Generations, Raidou Remastered: The Mystery of the Soulless Army edo Kunitsu-Gami: Path of the Goddess jokatuko ditugu, beste askoren artean, Nintendoren plataforma berrian. Fornite ere helduko da, bai.

Atzo aipatu genuen bezala, Hollow Knight: Silksong aurten estreinatuko da Switch 2 kontsolan, bukatzeko.

Argi dagoen bezala, hirugarrenen enpresen babes handia jasoko du Nintendok hurrengo belaunaldian. Azken urteotako joko gehiago Switch 2an ikustea espero da: adibidez, Capcom-en azken Resident Evil edo Monster Hunter tituluak.

Nintendo Switch 2 kontsola ekainaren 5ean merkaturatuko da.