2010eko jokoa dozenaka aldaketekin eta eduki berriekin kaleratu du Dragoi Bolaren zale taldeak. Doan joka dezakegu PCan.

Dragon Ball Online MMORPG klasikoa berpizteko proiektua burutu du zale talde batek. Ultimate DBOrekin sareko multijokalari abentura masiboaz berriz goza dezakete PCko jokalariek.

Webgune ofizialean aurkituko ditugu jokatzeko beharrezko guztiak. Onena, debalde ari gaitezkeela zerbitzari berrietan. Windows bertsioa soilik daukagu, baina egileen arabera GNU/Linux eta MacOS sistema eragileetan joka daiteke Wine erabilita.

2010. urtean estreinatu zen jatorrizko jokoa herrialde asiarretan; 2013an zerbitzariak bertan behera geratu baziren ere, zaleek kudeatutako hainbat proiekturen bidez jokatzen jarraitzeko aukera egon da. Ultimate DBO da azkena: otsailean argitaratu zuten eraberritutako bideojokoaren behin betiko bertsioa.

Son Gokuren DBZko abenturak bukatu eta 216 urte beranduago kokatzen gaitu istorioak. Saiya gerlarien eta lagunen oinordekoak izango gara, premisa interesgarritik abiatuz: gure pertsonaia sortuta —gizaki, namektar edo majin izaki artean aukera dezakegu, bakoitza bere azpimailekin—, manganimeko pertsonaiek sortutako eskola desberdinetan barneratuko gara arte martzialak ikasteko.

Borroken kasuan MMORPG mekanikak eta elementuak erabiltzen ditu DBOk: gure pertsonaiak ikasitako teknikekin zein erasoekin denbora errealeko dueluetan parte hartuko dugu, World of Warcraft eta beste zenbait titulutan egin bezala.

Horrela, Akira Toriyamak eratutako mundua libreki esploratuko dugu: hiri nagusiak, arte martzialen txapelketako eraikinak, Pilafen erresuma eta askoz gehiago zeharkatuko ditugu. Obra originalean ikusi gabeko tokiak eta misioak ikus daitezke, gainera, zaleen Ultimate bertsioan, baita pertsonaientzako azpimailak ere. Oreka zuzenketak, penduluaren gelako erronkak ere aipatzen dira, Jantzi eta itxura berriak gaineratu dituzte, bukatzeko.

Proiektu desiratu bezain erraldoia, beraz, Dragoi Bolak inoiz baino indar gehiago daukanerako. Dragon Ball Daima animea bukatzear dago —atal bakarra falta zaio—, eta kaleratutako azken bideojokoak, Dragon Ball: Sparking! Zero-k, sekulako arrakasta lortu du zaleen artean. Ezin gaitezke ahaztu, noski, mugikorretarako Legends edo Dokkan ospetsuez.

Etorkizunera begira, Bandai Namco-tik esku artean daukaten Son Gokuren bideojokoa Dragon Ball Project Multi da: doako MOBA titulua izango dena 2025ean gailu mugikorretan zein PCan kaleratzeko asmoa daukate.

Ultimate Dragon Ball Onlinez gozatu beharko, bitartean. Esan bezala, dohainik eskura dezakegu proiektuaren webgune ofizialaren bitartez.