Valor Mortis magia, tiroak eta naturaz gaindiko armada napoleonikoak batzera azalduko da urriaren 13an

One More Level garatzaileak eta Lyrical Games argitaletxeak Valor Mortis tiro jokoa urriaren 13an estreinatuko dela berretsi dute.

Hasiera batean irailaren 24rako aurreikusita zegoen tituluak proposamen eta girotze benetan bereziak dakartza. Napoleonen hildako soldadua izango gara, William Dowsett. Berpiztuta, Bonaparteren zein izaki ilun baten ahotsak entzuten ditu buru barruan, helburu desberdinak betetzeko aginduz.

Izurrite misteriotsua zabaltzen ari dela, lehen pertsonako ikuspegian tiroketak eta magia biziko ditugu protagonistarekin. Armada napoleonikoen aurka egingo dugu, berpiztutako izakiak nahiz munstroak aurkituta, garaiko armategia erabilita, baina baita aztikeriak eta bestelako abileziak ere. Kontraerasoak, bulkadak eta exekuzio odoltsuak gakoak izango dira bizirik jarraitzerako orduan.

Premisa interesgarriari atal grafiko ikaragarria batzen zaio: gudu zelaiek nahiz herrixka europarrek sekulako kalitate maila erakusten dute. Ez da gutxiagorako, garatzaileak Ghostrunner sagaren arduradunak baitira.

40 euroko prezioan merkaturatuko dela adierazi dute, bukatzeko: egileen arabera, Valor Mortisek “prezio osoa duten jokoen pareko kalitatea, fidelitatea nahiz 20 orduko istorioko iraupena” dauzka. Udazkena bideojoko handiz josita dagoenez, jokalarien “denbora eta dirua” eskatzen duten obra gehiegi daudela aldarrikatzen dute One More Leveletik.

Aste batzuk itxaron beharko ditugu, beraz, jokaldiak nola bukatzen duen ikusteko. Urriaren 13an PC, PlayStation 5 eta Xbox Series gailuetan argitaratuko da Valor Mortis.