Abenduaren 5ean Game Erauntsia eta Rolariak elkarteek topaketa berezia prestatuko dute Landakoguneko Kabi@n.

Durangoko Azoka bideojokoei begira jarriko da beste urte batez Gamer Gela topaketarekin. Landakogunera hurreratzen diren txiki zein nerabeek euskaraz goza daitezkeen tituluei buruz ezagutzeko zein hauek probatzeko aukera edukiko dute ikasle goizan.

Abenduaren 5ean jarri dugu hitzordua; ohi bezala, Kabi@ txokoan egongo gara, azokaren bihotzean, geroz eta zabalagoa den eskaintza aurkezten. 179 dira, gaur egun, gure hizkuntzan joka ditzakegun bideojokoak. Horietatik 30 dira aurten gure euskarazko bideojokoen zerrendara gehitutakoak.

“Hartzea ematea da”, dio aurtengo azokaren leloak. Horixe izan da, hain zuzen ere, euskal bideojokozaleen komunitateak bizi duenak: zaleek nahiz garatzaileek hartutako lanari esker goza dezakegu gure zaletasunaz gure hizkuntzan.

Zer nolako berritasunak eskainiko ditugu azokan, hortaz? Klasikoak, titulu independente ikaragarri bezain arrakastatsuak eta obra handi ezagunak eramango ditugu Durangora: Super Mario Bros. 3 mitikotik hasita, Stardew Valley zoragarria edo SOMA beldurrezko joko saritua egongo dira Kabi@n jarritako ordenagailuetan nahiz kontsoletan.

Euskal Herriko bideojokoak ikusarazi eta zabaldu nahi ditugu, noski: 2024an Voodoo Strikers, Munstro edo Chrono Club – Race Against Time jaso ditugu, besteak beste, euskal bideojokogileen aldetik, guztiak euskaraz.

 

Joko digitalak zein analogikoak

Gamer Gelan ez gara bakarrik egongo. Game Erauntsiakoekin batera izango dira, hirugarrenez, Rolariak elkarteko kideak.

Jokoen estiloa pixkat aldatuko da beraiekin, baina: mahai eta karta jokoak aurkeztuko dizkigute, eta eurekin batera hainbat partida jokatzeko aukera egongo da. Euskal Rol-Fuaren artean barneratzeko aukera ezin hobea izango da gazteentzat zein helduentzat.

 

Egitaraua

Egitarauari dagokionez, ikasle goizaren Gamer Gelak izen emate bidez funtzionatuko du. 10:30etik 14:00etara bitartean, Kabi@ra hurreratzen direnek Gamer Gelarako txartela eskura dezakete; horiekin ordu erdiko txandak antolatuko ditugu.

Arratsaldean, ordea, formatu askera itzuliko gara. 16:00etatik 19:30era Kabi@tik igarotzeko aukera edukiko duzue prestatutako bideojoko guztiak probatzeko.

Abenduaren 5ean animatu eta etorri Durangoko Azokako Gamer Gelara! Bideojokoetan zein mahai jokoetan aritzeko aukera bikaina izateaz gain, Game Erauntsiako zein Rolariakeko kideak desbirtualizatzeko eta elkar ezagutzeko egun aproposa da. Zuon zain egongo gara!