Hilabetea bukatu aurretik ekimen txiki ugari ikusiko ditugu: Moon Studios zein Nippon Ichi ere animatuko dira.

Ustekabean bideojokoen aurkezpenen agenda betetzen hasi zaigu. Martxoak garatzaile handien zein txikien ekitaldiak bilduko ditu: hain zuzen ere, Silent Hill Transmission, Humble Games Showcase edo Digimon Con jarraitu ahalko ditugu egunotan.

Bideojoko bakarrari eskainitakoak, indie jokoen ospakizunak edo errealitate birtualeko jokoenak izango dira martxoko aurkezpenetan batuko direnak.

 

No Rest for the Wicked – Wicked Inside

  • Noiz: Gaur, 17:00etan

Moon Studios-en hurrengo bideojokoak ia urtebete darama aurretiazko sarbidean: 2024ko apirilean estreinatu zen No Rest for the Wicked interesgarria. Early access fasea elikatzen jarraitzen dute oraindik: The Breach izeneko atal berria aurkeztuko dute bere osotasunean Wicked Inside aurkezpenean.

Gainera, estudioaren inguruko berritasunak nahiz ARPGarekin eguneratutako ibilbide orria aipatuko dituzte.

 

VR Games Showcase

  • Noiz: Gaur, 17:00etan

Ordu berean etorriko zaizkigu errealitate birtualeko jokoen garatzaile beteranoek antolatutako erakusleihoarekin. VR Games Showcasean Hitman: World of Assassination VR, RoboQuest VR edo Wrath: Aeon of Ruin VR ikusiko ditugu, besteak beste.

 

Humble Games Showcase

  • Noiz: Bihar, 17:00etan

Humble Games argitaletxetik titulu independenteen jaialdia dator. Askotariko generoetako joko esanguratsuak ikusiko ditugu: Threads of Time, Lost Skies, Monaco 2, Billie Bust Up aipatzen dituzte antolatzaileek, baita dagoeneko merkaturatu dituzten On Your Tail eta Wizard of Legend II bikainen gaurkotzeak ere.

Bestelako ustekabekoak ikusiko ditugu, bukatzeko: iragarri gabeko bi tituluren aurkezpenak zein hainbat ezusteko agintzen dituzte Humblekoek.

 

Silent Hill Transmission

  • Noiz: Martxoaren 13an, 23:00etan

Silent Hill 2ren berregitearekin belaunaldi berriek gozatzeko beldurrezko jokoa sortu ondoren, Konami indarberrituta dago saga beteranoari dagokionez. SH Transmission aurkezpenean 2022an iragarritako Silent Hill f itxurosoa ikusiko dugu berriro: behelainoa Japoniara eramango duela dirudi.

Konamikoek ez dute besterik aipatu, baina auskalo: SH klasikoen berregite gehiago ote datoz?

 

Chrono Trigger - 30. urteurreneko emanaldia

  • Noiz: Martxoaren 14an, 04:00etan

Berotzen hasi aurretik, lasai: ez dirudi Chrono Triggerren ezer berririk jasoko dugunik, oraingoz behintzat. JRPG maitatuaren 30. urteurrena ospatzeko YouTube bidezko emanaldi berezia prestatu dute Square Enix-ekoek: soinu banda zuzenean entzuteko aukera edukiko dugu.

Hala eta guztiz ere… “bideojokoaren mundutik haratago doazen askotariko proiektuak” prestatzen dabiltza arduradunak. Ziurrenik ez da ezer handia izango, baina adi egotea komeni.

 

Nippon Ichi Software UNTITLED

  • Noiz: Martxoaren 14an, 12:00etan

Nippon Ichi Software estudiokoek hainbat iragarpen ekarriko dizkigute Japoniatik. Kenzo Saruhashi presidenteak obra berriak aurkeztuko dituela aipatzen da prentsa oharrean: itxura batean, “aspalditik esperotako jarraipenak eta joko guztiz berriak” ezagutzera ematea da asmoa.

 

Digimon Con

  • Noiz: Martxoaren 20an, 03:00etan

Bandai Namco taldeak ohiko Digimon festa antolatuko du datorren astean. Munstro digitalen anime, karta joko, musika edo figura zein jostailu berrien informazioa eskainiko dute bertan, baita, nola ez, orain gutxi iragarritako bideojokoarena ere: Digimon Story: Time Stranger igaroko da ekitalditik.

JRPG ederra aurten kaleratzea aurreikusita dute japoniarrek; hortaz, agian argitalpen data ezagutzeko aukera edukiko dugu.

 

Future Games Show: Spring Showcase

  • Noiz: Martxoaren 20an, 21:00etan

Futur Games Show geroz eta indar gehiago hartzen ari den aurkezpenen formatua da, eta udaberriko iragarpenak bilduko dituzte datorren astean.

40 bideojoko baino gehiago aipatzen dira prentsa oharrean: FBC: Firebreak, Clair Obscur: Expedition 33, South of Midnight eta Reanimal, esaterako.

 

Martxokoak aipatuta, baina, agian apirilera begira jartzea ere komeni zaigu… Datorren hilabeteak gauza handiak datoz-eta.

 

Nintendo Direct Nintendo Switch 2

  • Noiz: Apirilaren 2an, 15:00etan

Hilabete baino gutxiago geratzen zaigu Nintendoren kontsola berria behar bezala ezagutzeko. Apirilaren 2an Switch 2ari buruzko xehetasun guztiak eskainiko dituztela espero dezakegu; hau da, prezioa, kaleratze data zein merkaturatzearekin batera iritsiko diren bideojokoetako batzuk.

Oraingoz Mario Kart baino ez digute erakutsi, baina ziur N handikoek ezusteko gehiago dituztela esku artean.

 

NieR - 15. urteurreneko emanaldia

  • Noiz: Apirilaren 19an, 10:00etan

Yoko Taro zuzendaria eta lagunak NieR saga maitatuari buruz hitz egiteko bilduko dira frankiziaren 15. urteurrenean. Ekitaldien eta merchandisingaren inguruan ariko direla aipatu dute, baina aurreko ekitaldi handian NieR Replicant ver.1.22474487139… jokoa iragarri zuten… beraz, adi.