Guard Crush Games eta Dotemu obra klasiko bezain berritzailea prestatzen dabiltza. Magia eta ezpatak eskainiko dizkigute dozenaka izaki jipoitzeko.

Absolum aurkeztu dute Streets of Rage 4ren egileek. Roguelite elementuak biltzen dituen beat ‘em up abenturak azken SoR zein Golden Axe bezalako klasikoen ideiak batuko ditu.

Talamh mundua ezagutuko dugu Absolumen: fantasiaz zein bestelako beldur kosmikoez betetako erresuma erraldoia. Hondamendi magiko baten ostean kokatzen da istorioa: Azra izeneko eguzki erregeak gerra baino ez dakar, eta gure lau protagonistek osatutako taldeak aurre egingo dio.

Aztia, ipotxa, gerlaria, eta, nola ez, alproja batuko ditu heroi taldeak. Guztiak kontrola ditzakegu, bakarka edo kooperatiboan, bakoitza bere abileziekin eta indarguneekin. SoR 4 bikainarekin egin bezala, ohiko beat ‘em up mekanikak biziberritu gura dituzte Guard Crush Games taldekoek, konbo eta objektu sistema konplexua osatuz. Ezpatadakak, aztikeriak, rifleak eta bestelakoak erabiliko ditugu borroketan.

“Birjokagarritasun amaigabea” agintzen dute egileek: dirudienez, partida bakoitzean hainbat bideren artean hauta dezakegu, eta, halere, duelu zein jazoera desberdinak ikusiko ditugu partida berria hasterakoan. Misioak, hobetzeko abilezia egonkorrak, NPCak eta beste hainbat elementu aipatzen dituzte.

Proposamen erakargarria da, batez ere Golden Axe edo Dungeons & Dragons: Tower of Doom nahiz Shadow over Mystara mitikoen zaleentzat; halaber, jokoaren atal estetiko zainduarekin harrapatu dituzte begirada guztiak. Eskuz landutako sprite zoragarriak ikusiko ditugu Absolumen: pertsonaiek zein kokalekuek ikaragarrizko maila erakusten dute.

Absolum PlayStation eta Nintendo kontsoletan zein PCan argitaratuko da. Ez dauka argitaratze datarik, baina Dotemu argitaletxetik “laster” merkaturatzeko asmoa agertu dute.