Supamonks, Guard Crush eta DotEmu estudioen elkarlanak beat ‘em up kolpeak roguelike ezaugarriekin uztartzen ditu. PC, Nintendo eta PlayStation plataformetan jasoko dugu.

DotEmu argitaletxeak Absolum urriaren 9an argitaratuko duela iragarri du. Datarekin batera, azken protagonista ezagutzera ematen duen bideoa zabaldu du talde frantsesak: Brome apo magoa.

Mowlai izeneko arrazako kidea aztikeriak erabilita hainbat arerio garaitzeko gai izango da; ez hori bakarrik, makila hartuta kolpeka ariko da. Laugarren pertsonaia dugu Brome: Galandra, Karl eta Cider lagunei gehitzen zaien azkena.

Bi dimentsioko beat ‘em up abentura interesgarria da Absolum. Eguzki jainkoari aurre egingo diogun matxinoen taldea osatuko dugu; generoan ohiko den modura, partida bakoitzean hasieratik abiatuko gara kolpeka, saihesteekin eta eraso bereziekin dozenaka arerio garaitzeko. Maila bakoitza bukatu aurretik, buruzagi erraldoien aurka egin beharko dugu, noski.

Berezitasunak lehen partida bukatu bezain laster azalduko zaizkigu, ordea: roguelike elementuak bereganatzen ditu Supamonks, Guard Crush eta DotEmu estudioak sortzen dabiltzan tituluak. Horrela, partida bakoitzean egindako aurrerapen nagusi desberdinekin ezaugarriak desblokeatu, abileziak lortu eta bide berriak aurkituko ditugu: esaterako, suntsituta zegoen zubi bat konpontzeko beharrezko baliabideak bil ditzakegu, hurrengo saioetarako lasterbidea sortuz.

Gauza bera gertatuko da gure protagonistekin eta hauen abileziekin, estatistika orokorrak hobetzeko baliabideak eskuratuko baititugu. Partidan zehar, baina, gure jokatzeko era eraldatzeko aldagarriak eta indartzaileak aurkituko dituzte protagonistek, ibilbide bakoitzari gatza eta piperra erantsita.

Jokoaren atal grafiko ikaragarria azpimarratzekoa da, gainera: eskuz marraztutako sprite diseinu ikaragarria aurkezten digu Absolumek, Hellboy bezalako komikien antzeko estetika hartuta. Guard Crushekoak Streets of Rage 4 zoragarrian lan egindakoak izanik, ez da harritzekoa —kasualitatez, SoR 4ko beste taldea, Lizardcube, argitaratu berri den Shinobi: Art of Vengeance itzelaren atzean dago—.

Interesa daukatenek demo luzea probatzeko aukera daukate, gainera: Steam bidez jaitsi daiteke. Hiru pertsonaia, hainbat maila desberdin eta sekretu ugari biltzen ditu.

Absolum Nintendo Switch eta PlayStation 5 zein PlayStation 4 kontsoletan estreinatuko da, baita PCan ere, urriaren9an.