Bideojoko berrien zein port eta birmasterizazioen hilabetea datorkigu. Fatal Fury: City of the Wolves, Commandos: Origins eta Forza Horizon 5 ere ikusiko ditugu.

Inuzenteen eguna da nazioartean, baina Game Erauntsiatik bideojokoen agendarekin hasiko dugu apirila, estreinaldi interesgarriak baitatoz egunotan.

Xbox zein PlayStation taldeetako estudioen jokoak ikusiko ditugu —baina ez ohiko moduan!—, baita beste talde txikiagoen obrak: South of Midnight, Clair Obscur: Expedition 33, Fatal Fury: City of the Wolves, The Last of Us Part II Remastered, Indiana Jones and the Great Circle, Forza Horizon 5… ez datoz joko txikiak, agerikoa den bezala.

Errepasa ditzagun nabarmenenak!

 

The Last of Us Part II Remastered

  • Argitaratze data: 2025-04-03
  • Garatzailea: Naughty Dog / PlayStation Studios
  • Generoa: Abentura, akzioa
  • Plataformak: PC

The Last of Usen bigarren atala polemika —lelo— artean estreinatu zen PS4an duela bost urte. Iaz birmasterizazioa jaso zuen PS5ean, denetariko eduki berriak jasota, eta horixe bera da orain ordenagailuetara iritsiko dena.

Ellie gaztearekin biolentziaz eta mendekuz betetako mundu gogorrean barneratuko gara. Cordyceps onddoak gizadia ia deuseztatu ondoren, bizirautea ez da batere erraza… isilpean eta baliabideak kudeatzen aritzea ezinbestekoa da Naughty Dog taldearen maisulanean. No Return roguelike modalitate interesgarriak berritasunak jasoko ditu PCan.

 

South of Midnight

  • Argitaratze data: 2025-04-08
  • Garatzailea: Compulsion Games / Xbox Game Studios
  • Generoa: Abentura, akzioa
  • Plataformak: Xbox Series, PC

Hazel gaztearen rola jokatuko dugu AEBetako hegoalde barrenera bidaiatzeko South of Midnight itxurosoan. We Happy Few ezagunaren arduradunek plataformak, esplorazioa eta borrokak elkartzen dituen hirugarren pertsonako abentura ederra osatu dute: segundoko irudien tasa baxuarekin sortutako animazioak ditugu, baina, lasai, desaktiba daitezke-eta.

Bayou mitologiako izakiak eta mundua ezagutzeko aukera aproposa izango da jokalariontzat, orain arte joko gutxitan agertutako folklorean sakontzen baitu.

 

Commandos: Origins

  • Argitaratze data: 2025-04-09
  • Garatzailea: Claymore / Kalypso Media
  • Generoa: Estrategia
  • Plataformak: PC, PS5 eta Xbox Series

Pyro Studios espainiarraren Commandos saga mitikoa bueltan da, baina oraingoan Claymore alemanak hartu du Origins garatzeko ardura.

Jack O’Hara txapel berdeak eratutako talde bereziaren lehen misioak biziko ditugu, ohi bezala, estrategia taktikoa eta isilpea proposatuz. Kooperatiboan aritu ahalko gara lagun batekin, presta zaitez, beraz.

 

Monaco 2

  • Argitaratze data: 2025-04-10
  • Garatzailea: Pocketwatch Games / Humble Games
  • Generoa: Akzioa, isilpea
  • Plataformak: PC, PS5 eta Xbox Series

Indie jokoen artean oso maitatua da lehen Monaco, eta Pocketwatchekoak bigarrenarekin guztia hobetzera datozela dirudi. Lapurreta kooperatiboak biziko ditugu Monaco 2n: abilezia sorta anitza duen gaizkile taldea gidatu beharko dugu altxorrak eskuratzeko.

Guztia ondo planifikatu eta adostu ondoren, zaintzaileak, segurtasun tranpak eta bestelakoak gainditzeari ekingo diogu. Koordinazioa ezinbestekoa da, noski, baina prestatutakoek oso gutxitan amaituko dute espero bezala…

 

Indiana Jones and the Great Circle

  • Argitaratze data: 2025-04-17
  • Garatzailea: MachineGames / Xbox Game Studios
  • Generoa: Abentura, akzioa
  • Plataformak: PlayStation 5

Indy Xbox Series eta PC plataformetara iritsi zen pasa den abenduan, baina, indarrik galdu gabe, PlayStation 5era dator apiril honetan. MachineGames taldeak lehen zein hirugarren pertsonako ikuspegia uztartzen dituen akzioz betetako abentura bikaina garatu du, publikoaren nahiz prentsaren laudorioak lortuta.

Mundu osotik zehar ibiliko gara munduko arkeologorik ospetsuenarekin batera puzzleak gainditzen eta nazien aurkako tiroketetan parte hartzen. Immersive sim puntutxoarekin, esploratzea eta aurrera egiteko bide desberdinak aurkitzea gustuko dutenek gozatzeko titulua da Indiana Jonesena.

 

Clair Obscur: Expedition 33

  • Argitaratze data: 2025-04-24
  • Garatzailea: Sandfall Interactive
  • Generoa: JRPG
  • Plataformak: PC, PS5 eta Xbox Series

Sandfall frantsesaren lehen lana RPG japoniarren elementu ugari hartuko dituen bideojoko ikusgarria da. Final Fantasy edo Persona inspirazio iturri hartuta, txandakako borrokak, esplorazioa eta narratiba sakona ikusiko ditugu Clair Obscur: Expedition 33n.

Belle Époque frantsesaren estetika elementuekin mundu berezia eta bizia eratu dute, gainera: esaterako, retro estiloko mundu mapaz harro agertu dira egileak. Adin bereko pertsona oro hiltzeko ahalmena duen margolaria geldiaraztea izango da gure taldearen helburua.

 

Fatal Fury: City of the Wolves

  • Argitaratze data: 2025-04-24
  • Garatzailea: SNK
  • Generoa: Borroka
  • Plataformak: PC, PS5, PS4 eta Xbox Series

Urte gehiegi igaro dira azken Fatal Furytik. Arkade aretoetan Terry edo Andy Bogard anaiekin ibiltzen ginenok berriz gozatzeko aukera daukagu, ordea Fatal Fury: City of the Wolvesekin —nahiz eta KoF guztietan dauden!—. 3D atal estetikoa hartzen badu ere, 2D jokagarritasun klasikoa ikusiko dugu.

Borroka sistema konplexua eta ikusgarria agintzen du bideojokoak, baina jokalari hasiberriei zuzendutako laguntzekin. Eta, bai, badakigu: Cristiano Ronaldo sartu dute…

 

Forza Horizon 5

  • Argitaratze data: 2025-04-29
  • Garatzailea: Playground Games / Xbox Game Studios
  • Generoa: Lasterketak
  • Plataformak: PlayStation 5

Enpresa handien bideojokoak ezohiko moduan ikusiko genituela esan dizuegu: Forza Horizon 5 da apirileko azkena. Izan ere, PlayStation 5ean estreinatuko da 2021eko lasterketa joko bikaina.

Mexiko esploratuko dugu oraingoan auto gainera igota: lasterketak zein mundu irekiko probak dakartza Playground Gamesen lanak. 800 auto inguru, erronka mordoa eta apirilaren 25ean kaleratzen den Horizon Realms doako eguneraketa bilduko ditu PS5eko bertsioak.

 

Skin Deep

  • Argitaratze data: 2025-04-30
  • Garatzailea: Blendo Games / Annapurna Interactive
  • Generoa: Akzioa / Immersive Sim
  • Plataformak: PC

Hilabetea joko ero bezain interesgarriarekin bukatu behar genuen. Immersive sim eta roguelike azpigeneroak elkartzen dituen obra bitxia da Skin Deep: espazio ontziak piratengandik babesteaz arduratzen den Nina Pasadena agentea kontrolatuko dugu.

Gure helburua: misio desberdinetako ontzietan preso hartutako tripulazioa salbatzea —katuak dira—, piratak akabatzen ditugun bitartean —euren buruak komunetik behera botako ditugu, adibidez—. Horretarako espazio ontzitik sakabanatutako objektuak modu aproposean erabili beharko ditu gure protagonistak, baita zirrikitu guztiak ondo ezagutu ere. Demoa probatu, merezi du-eta!