Urriaren 10ean estreinatuko da ordenagailuetan zein PS5 eta Xbox Series gailuetan.

Battlefield saga indarberritzeko asmoarekin dator seigarren atalari esker. Bideojokoari buruzko zenbait datu eskaini ondoren, EAkoak PCra begira jarri dira, BF 6k bertan jasoko dituen ezaugarri berezi guztiak nabarmenduta.

Battlefield Studios osatzen duten Criterion, DICE, Motive eta Ripple Effect estudioek bideo berria argitaratu dute ordenagailuetan kalitate handian jokatu ahalko dela erakusteko. Ohi bezala, 4K bereizmena, mugarik gabeko segundoko fotogramen tasa, pertsonalizazio aukera zabalak —600 baino gehiago— eta NVIDIA DLSS, Intel XeSS nahiz AMD FSR eskalatze teknologien erabilera aipatzen dira trailerrean.

Horrez gain, Battlefield Portal tresna erakutsi dute egileek. “Batailaren mugak berdiseinatzeko” balio duen programa mapak eraikitzeko eta moldatzeko bidea izango da berriz, adibidez, objektuak edo eraikinak kopiatuta, ondoren sortutakoak partekatzeko eta jokatzeko aukera eskainita. Joko mota berriak ere sortu ahalko ditugula diote.

Azken urteotako Battlefield jokoek harrera eskasa eduki badute ere, seigarren atalarekin zaleen aurreikuspenak eta itxaropenak betetzera datozela dirudi. Duela aste batzuk abiatutako beta irekia arrakasta handikoa izan zela aipatu dute EAtik, “inoiz baino jokalari gehiago bilduta”; ez hori bakarrik, partaideen iritziak baikorrak dira orokorrean.

2027. urtean kokatzen da BF 6. Kokaleku anitzak proposatuko dizkigute oraingoan: New Yorkeko kaleak, Egipto edo Gibraltar bisitatuko ditugu, besteak beste. Multijokalaria izango du ardatz, baina kanpaina zabala ere agintzen digute arduradunek. Lau soldadu mota desberdin, ibilgailu sorta zabala, suntsipena eta multijokalari modalitate mordoa ere bilduko ditu.

Zaleek ez dute askorik itxaron beharko BF 6n jokatzen hasteko: urriaren 10ean merkaturatuko da PCrako, PlayStation 5erako zein Xbox Seriesetarako.