UEMAk gazteen ikus-entzunezkoen kontsumoari buruzko ikerketa aurkeztu du. Ikasleen % 3,5ek euskaraz kontsumitzen dituzte jokoak.

Udalerri euskaldunetako gazte gehienak ohiko bideojokalariak dira. Hori adierazi du Udalerri Euskaldunen Mankomunitateak Eusko Legebiltzarrean aurkeztutako gazteen ikus-entzunezkoen kontsumoari buruzko ikerketan. Garikoitz Goikoetxea UEMAko teknikariak ezagutzera emandako datuen arabera, hiru gaztetik bik bideojokoetara aritzeko ohitura daukate egunerokotasunean.

Ikerketa burutzeko LH4tik Batxilergoko 2. maila bitarteko ikasleak diren 94 udalerrietako 11.571 gaztek bete dute UEMAren galdetegia, mankomunitatekoek beren web orrialdean adierazi dutenez. Txosten osoa hemen irakur daiteke, baina eskualde bakoitzeko datuak biltzen dituzten txostenak ere argitaratu dituzte.

Bideojokoen esparruan bi aztergai erabili dituzte oinarritzat inkesta osatzerakoan: alde batetik, bideojokoetan emandako denbora zenbatekoa den; beste aldetik, tituluak zein hizkuntzatan kontsumitu diren.

 

Partida motzak nagusi

Esan bezala, gazte euskaldunen gehiengoak bideojokoak kontsumitzen ditu. Lehen Hezkuntzako ikasleen % 78 murgiltzen da mundu honetan; lautik hiruk jokatzen dute, beraz. Derrigorrezko Bigarren Hezkuntzako gazteei dagokienez, % 65 dira jokatzen dutenak; hirutik bik. Batxilergoan, azkenik, % 43 dira bideojokoetara dabiltzatenak; bostetik bi.

Gazteen % 25,9k ordu erdi baino gutxiago ematen du egunean jokatzen; % 17,5ek ordu erdi eta ordubete artean igarotzen du partidetan; % 13,5ek ordubete eta bi ordu artean aritzen da; % 9,7k bi ordutik gora jokatzen du. Bukatzeko, ikasleen % 33,3k ez du bideojokorik erabiltzen.

Bideojokalarien generoan ere sakondu dute inkestarekin. Gizonezkoen gehiengoa (% 89) bideojokoetan aritzen da. Emakumezkoak, berriz, ez dira horren bideojokozaleak: gutxiengo batek jokatzen duen arren, inkestatuen ia erdiak (% 45) gozatzen du bideojokoez. Bukatzeko, antzekoa gertatzen da ikasle ez binarioekin: gutxiengoa (% 43) da bideojokoen erabiltzailea.

Euskararen presentzia urria

Jokatzerakoan hautatzen edo erabiltzen duten hizkuntzari dagokionez, nola ez, euskarari begira jarri dira UEMAkoak. Eskuratutako emaitzak esperotakoak zein larriak dira: inkestatuen % 3,5ek baino ez du bideojokoetara euskaraz jokatzen. Ez dira jokoak zein plataformak aipatzen; hala ere, suposatzekoa da Egunean Behin, Berbaxerka edo bestelako hezkuntza bideojokoetatik lortutako emaitza izatea.

Lehen Hezkuntzako gaztetxoak dira gehienbat euskaraz jokatzen dutenak (% 8 ). DBHko eta Batxilergoko ikasleen kasuan, ez dute ia euskaraz jokatzen (% 1).

Kontsumoa ez ezik, bideojokoen eskaintzari erreparatu behar zaiola nabarmentzen dute UEMAkoek euskarazko jokoen kasuan. Bideojokoen itsasoan euskarazkoak tanta batzuk baino ez diren arren, azken urteotan sekulako gorakada ikusi dugu hauen kopuruan.

Batetik, euskal garatzaileen areagotzea ikusi dugu, eta, horri esker, baita euskaraz kaleratutako jokoena ere. Bestetik, euskal bideojokozaleen komunitateak gogor ekin dio lanak itzultzeari: 2022an, momentuz, 27 titulu argitaratu edo lokalizatu dira euskaraz. Iaz, berriz, 20 bat joko jaso genituen gure mintzairan.

Game Erauntsiaren erronka ez datza soilik bideojokoak euskaraz egotean; hauek ezagutzera ematea eta gure aisialdian euskaraz aritzeko lekua ere badagoela helarazi nahi diegu gazte zein nagusi euskaldunei.

Euskaratutako bideojoko guztiak biltzen dituen zerrenda eraberritu dugu asteon, gainera: diseinu erakargarriagoa prestatzeaz gain, iragazkiak eta itzulpen proiektuak inplementatu ditugu. Hemen aurkituko duzu Game Erauntsiaren zerrenda.

 

Twitchen ibili bai, baina ez euskaraz

Sare sozialak eta bideoen nahiz zuzenekoen webguneak izan dira UEMAko inkestaren beste gaietako bat. Horien artean egon da, nola ez, Twitch: ikasleen % 24k ikusten dituzte Amazon-en plataformako edukiak —gainerako zerbitzuen atzean geratuta—. Espero modura, bertan gehien kontsumitzen den esparrua bideojokoena da: hauei lotutako edukiek gazte euskaldunek kontsumitzen dutenaren % 26 suposatzen dute.

Twitchen jarraitutako kontuen eta eduki sortzaileen hizkuntzari dagokionez, euskararen presentzia benetan urria da: ikasleek ikusten dituzten sortzaileen % 2,1 soilik aritzen da euskaraz. Mundu honetan ere euskarazko edukien zenbatekoa hazten ikusi dugu azken urteotan: geroz eta gehiago dira Twitchen zuzenekoak egitera animatzen diren euskaldunak. 3000Twitz ekimenaren aterpean batu dira gehienak; Game Erauntsiaren kasuan ere, Euskal Twitch Komunitatearen zerrenda osatu dugu.

UEMAk egindako inkestaren arabera, ikasleek ere edukiak sortzen dituzte: % 3,1 zuzenekoak euskaraz ematen ibiltzen da.

Iraitz Lazkano UEMAko lehendakariak adierazi duenez, “eskola eta herri askotan kezka handia sumatu dugu ikus-entzunezkoen kontsumoak gaztetxoen hizkuntza ohituretan duen eraginagatik”. Hori horrela, ikasleon gaur egungo “errealitatea aztertzea” izan da mankomunitateko arduradunek emandako lehen pausoa. Orain, bigarren zeregina datorrela azpimarratu dute: “Diagnostikoaren argitan neurriak hartzea”.