Akziozko abentura epikoa agintzen dute madrildarrek. PS5, Xbox Series eta PC gailuetan kaleratuko da.

Blades of Fire iragarri du Madrilgo MercurySteam estudioak. Aurkezpena argitaratze data zehaztuta egin du: maiatzaren 22an merkaturatzeko asmoa dauka.

Aran heroian —Samus Aran-i egindako keinua ote?— bilakatuko gara Adso gaztearekin batera akzioz betetako abentura bizitzeko. Burdina desagerrarazi, eta harrian bilakatu duen Nerea erreginaren armaden aurka egingo dugu: hack and slash kutsu argia dauka Blades of Firek.

Burdina eta magia izango dira ardatzak; izan ere, gure protagonistek denetariko armak sortzeko ahalmena edukiko dute burdinola erabilita. Dirudienez, gure armategia pertsonalizatzeko aukera sorta zabala prestatuko dute egileek.

Bideoa eta irudiak ikusita, aurretik MercurySteamekoek sortutako Castlevania: Lords of Shadow 1 eta 2 datoz gogora. Aldi berean, Sony Santa Monica taldeak garatutako azken God of War jokoetan pentsa dezakegu borrokak ikusita: protagonistaren sorbaldan kokatutako kamerarekin, kolpeak saihesten eta kontraerasoak nahiz exekuzioak burutzen ariko gara.

Plataformei dagokienez, PlayStation 5ean zein Xbox Series-etan jokatuko dugu. Ordenagailuetan ere merkaturatuko dute: hori bai, Epic Games Store saltokiaren bidez bakarrik. Aipatu modura, maiatzaren 22an kaleratuko da Blades of Fire.