Clair Obscur: Expedition 33 bideo ikusgarriarekin itzuli da bere aktore nagusiak ezagutzera emateko

Clair Obscur: Expedition 33 itxurosoak harritzen jarraitzen du. Bideojokoko protagonistei bizia ematen dieten aktoreak iragartzeko bideoa argitaratu dute Sandfall Interactive estudiokoek eta Kepler Interactive argitaletxekoek, bide batez, abenturaren mekanika eta irudi berriak aurkeztuz.

Talde frantsesaren lehen bideojokoa izango da Clair Obscur, baina Japoniara begira jarri dira sortzerako orduan. Inspirazio iturriak argiak dira: Persona edo Final Fantasy bezalako JRPG ezagunen oinarriak bereganatu dituzte. Txandakako borrokak dira ardatza —denbora errealeko QTE ekintzekin—, oinarrian gidoi sendoa txertatuta.

Margolari misteriotsuari heriotza margotzea ekiditea izango da gure heroi taldearen helburua: urtero zenbaki bat margotzen du, eta adin horretako pertsona oro desagertu egiten da. 33 da hurrengo zenbakia, hain zuzen ere.

Belle Époque frantseseko estetika hartuta, Unreal Engine 5 garapen motorearekin sortutako mundu ederrean barneratuko gara. Modeloak, efektuak, inguruneak… ikustekoak dira, egia esan, aurkezpena ikaragarria baita.

Aktoreak aipatu ditugu lehen, eta, aipatzekoak dira, egia esan: Andy Serkis, Charlie Cox, Kirsty Rider, Shala Nyx eta Benn Starr bezalako aurpegi ezagunak dabiltza proiektuan parte hartzen.

JRPG abenturen zaleek bai ala bai jarraitu beharreko titulua, beraz, baina publiko zabalagoarengana iristea ere espero dute atal grafiko zoragarriarekin zein aktore ezagunekin. Clair Obscur: Expedition 33 2025eko udaberriean kaleratuko da —egun zehatza ezagutzea geratzen zaigu— PC, PlayStation 5 eta Xbox Series plataformetan; Game Pass harpidetzan eskainiko dute lehen egunetik.