PC, PS5 eta Xbox Series plataformetan kaleratuko da, ohiko jokagarritasuna berritasunekin uztartuta.

Commandos: Originsen argitaratez data ezagutzera eman du Kalypso Media argitaletxeak: apirilaren 9an estreinatuko da Claymore Game Studios prestatzen ari den estrategia jokoa.

Jack O’Hara txapel berdeak eratutako talde bereziaren lehen misioak kontatuko dizkigu Commandos mitikoaren atal berriak. Pyro Studios espainiarra ez da izango jokoa garatzeaz arduratuko dena, baina Claymore alemaniarrak aspaldi abiatutako sagaren oinarriak mantenduko dituela dirudi.

Horrela, denbora errealean kontrolatu beharreko soldadu taldea aurkeztuko zaigu. Mundu osoan zehar sakabanatutako mota desberdinetako misioak gainditu beharko ditugu beraiekin: sabotajeak, erreskateak eta gehiago burutu beharko dituzte txapel berdeak, zulatzaileak, frankotiratzaileak, gidariak, marineak eta espioiak.

Bakoitzak, zelan ez, berezko abileziak erabiliko ditu: isilpeaz baliatzearekin batera, ezinbestekoak izango dira aurrera egiteko. Ez dago misioak gainditzeko modu bakarra, baina aproposena aurkitzea gure esku egongo da.

Ekintzen koordinazioa da jokoaren muinetako bat: talde osoa modu eraginkorrean erabiltzen ikasi beharko dugu; zorionez, hori kudeatzeko modu aproposa izango da tokiko zein sareko multijokalaria. Lagun batekin erronka guztiak gainditzeko aukera edukiko dugu Commandos: Originsen.

Are hobeto, jokoa kaleratu aurretik doako demoa proba dezakegu. Steam bidez jaitsi dezakegu.

2023an ezagutu genuen estrategia titulua. Iaz merkaturatzeko asmoa zegoen, baina, azkenean, berandutzea jasan zuen: esan bezala, apirilaren 9an iritsiko da saltokietara. PCan zein PlayStation 5 eta Xbox Series kontsoletan merkaturatuko dute; PlayStation 4 eta Xbox One bertsioak ere iragarrita daude, baina, printzipioz, beranduago iritsiko dira.