PlayStation 5ean jokatuko dugu. Hamar minutuko trailer ikusgarriak Metal Gear sagari hainbat keinu egin dizkio.

Hideo Kojima bideojoko zuzendari ezagunak Death Stranding 2: On The Beachen argitalpen data iragarri du SXSW (South by Southwest) azokan. Ekainaren 26an estreinatuko da Sam Porter Bridges banatzailearen abentura berria.

Nola ez, gidoiari lotutako aurrerapen eta spoiler ugari biltzen dituen bideoarekin jakinarazi du kaleratze data Kojima Productions taldeak. Hamar minutuak gainditzen dituen trailerrean pertsonaia ezagunak nahiz berriak ikusiko ditugu, baita beste hainbat ezusteko ere.

Dibertigarrienak, ziurrenik, Metal Gear sagari egindako keinuak dira. Solid Snake gogora ekartzen duen gizona ageri da bideoan, bandana eta guzti; ez hori bakarrik, une batean Metal Gear robot gaineko borrokak ere biziko ditugula ikus daiteke. Itxura batean, ez baitakigu ze demontre ari den gertatzen.

Hori alboratuta, Death Stranding originalaren antzeko proposamena ekarriko digu On The Beachek. Sam Porter kontrolatuta, fardelak toki batetik bestera eramatea izango da gure helburu nagusietako bat: oztopo geografikoak gainditu eta saihestu beharko ditugu helmugara heltzeko, horretarako hainbat tresnaz zein ibilgailuz baliatuta. Bidean, baina, denetarikoak aurkituko ditugu, naturaz gaindiko izakiak barne.

2022an aurkeztu zuen bigarren atala Kojimak. Iaz arte ez genuen askorik jakin bere inguruan, baina, argitaratze data hurreratu ahala, bideo eta irudi gehiago utzi dizkigu egileak.

Esan bezala, ekainaren 26an merkaturatuko da Death Stranding 2: On The Beach. PlayStation 5eko esklusiboa izango da, hasiera batean, behintzat: 2019ko jatorrizko titulua beranduago iritsi zen PC eta Xbox plataformetara —iazko azaroan jaso genuen kontsola berdean—.