Denshattack! trenak skate duelu koloretsuekin elkartzera datorren eromena da

Tren gainean irristatzeko, trikimailuak egiteko, une eroak bizitzeko eta buruzagi erraldoien aurka egiteko gogoz? Denshattack! indie titulu bereziak proposatzen duena da: arkade jokagarritasuna premisa zirraragarriarekin batuko du Undercoders taldearen jokoak.

Tony Hawk’s Pro Skater edo 3D Sonic jokoen bezalakoen oinarriak hartuta, Japoniarrek trenekiko duten maitasuna hartu du Bartzelonako estudioak ideia zoroa osatzen hasteko. Tren desberdinak gidatzen dituzten bandak aurkituko ditugu Denshattacken —hau da, trenen erauntsiaren—munduan: Japonia osoa zeharkatuko dugu hauen aurkako borrokak bizitzeko.

Ez dira, baina, tren arruntak: jauzi egiteko, hormetatik irristatzeko eta skaterren ohiko ollie edo kickflip trikimailuak egiteko gai dira. Egoera bereziagoak ikusiko ditugu, gainera: noria baten gainean menditik behera irristatuz ariko gara desafioetan, besteak beste.

Cel shading estetika koloretsuarekin, gure ibilgailua pertsonalizatzen eta eraldatzen joango gara borroketan lortutako erreputazio puntuekin. Trena hobetzea ezinbestekoa izango da, etsai nagusien kontrako dueluak biziko baititugu mailen bukaeran: mecha robot erraldoiak, eraldatutako gazteluak eta gehiago aurkituko ditu gure protagonistak.

Begirada bakarrean maitemintzeko moduko titulua prestatzen dabiltza Koa and the Five Pirates of Mara edo Mail Mole jokoetan lan egindako garatzaileak.

2026ko udaberrian estreinatuko da Denshattack!, baina eguna zehaztu gabe utzi dute, oraingoz; plataformak zeintzuk izango diren adierazi dituzte, hori bai. PCan zein PlayStation 5 eta Xbox Series kontsoletan merkaturatuko da trenen zoramena.