Deabruen erresumak esploratuko ditugu gaztetutako Son Gokurekin. Bi ataletan banatuko dute: lehena uztailaren eta irailaren bitartean jasoko dugu.

Dragon Ball Z: Kakarot ARPG abenturaren espantsio berria iragarri dute Bandai Namco-k eta CyberConnect 2k. Daima: Abentura deabru erresuman zehar izenarekin (Daima: Adventure Through the Demon Realm), oraintsu estreinatutako Dragoi Bola Daima animearen jazoerak kontatuko ditu.

Akira Toriyama sortzailearen azken lana da Daima. Gaztetutako Son Goku, Vegeta, Bulma, Satan Txiki eta gainerako lagunak ezagutuko ditugu bertan: deabruen errege berriak dragoi bolei eskatutako desiraren ostean, honen atzetik jo beharko dute Glorio, Shin eta Panzy adiskide berriekin. Esploratzeko gune ezezagunak izango dira DLCaren berritasunetako bat. Helburu nagusia deabruen munduko dragoi bolak biltzea da.

DLCak bi zati nagusi edukiko ditu. Lehena, diotenez, aurtengo uztailaren eta irailaren bitartean merkaturatuko dute; bigarrena, berriz, 2026ko urtarrila-martxoa bitartean estreinatuko da.

Arduradunek ez dute bideorik eskaini, baina aurreko espantsioekin jasotakoen antzekoak ikusiko ditugula pentsa dezakegu: mundu ireki berria, zinematikaz eta hizketaldiz jositako istorioa, misioak, eta, noski, pertsonaia nahiz transformazio berriak.

Gokuren mini bertsioarekin jokatuko dugu oraingoan, eta bere berezitasunak dauzka. Makila miragarria erabiltzearekin batera, intsektu indartzaileak dauzka denetariko hobekuntzak eskuratzeko; gainera, Panzy borroketan laguntzen ariko da.

Dragon Ball Z: Kakarot 2020an argitaratu zuen Bandai Namcok. Harrera ona eduki zuen mundu irekiko ARPG handiak, baita kritikak ere. Dena den, sei eduki gehigarri handi kaleratu dituzte oraingoz; Daimarena zazpigarrena izango da.

Dragoi Bola Daima animea, bestalde, asteon bukatuko da: bihar, zehazki. 20 ataleko telesaila iazko urrian ematen hasi ziren telebista japoniarrean.

Esan bezala, Daima: Abentura deabru erresuman zehar eduki gehigarriaren lehen atala uztailetik iraila bitartean jasoko dugu. DBZ: Kakarot nahitaezkoa izango da jokatzeko: kontsola nagusi guztietan zein PCan eskura daiteke.