Hiru jokalariko taldeek roguelike estiloko partida motzak biziko dituzte. PlayStation, Xbox Series eta PC gailuetan kaleratuko da FromSoftware-n lan berria.
Elden Ring Nightreignen kaleratze data zehaztu dute Bandai Namco eta FromSoftware enpresek. Maiatzaren 30ean argitaratuko dute Elden Ring maisulana oinarritzat hartzen duen abentura kooperatiboa.
Bitarteko Lurrak eraldatuta ikusiko ditugu aurrekotik nabarmen aldetzen den titulu berrian. Roguelike izaera nagusituko dira, partida bakoitzean prozeduralki eratutako kokalekuak bisitatuta.
Bakarka zein beste bi lagunekin —ez dago binaka jokatzeko aukerarik, ordea— hiru egun biziko ditugu: gau bakoitzeko buruzagia akatzea izango da helburua, azkenean Gaujaunaren aurka borrokatzeko. Gune nagusia txikituz joango da egunek aurrera egin ahala, erdiko puntura gidatuz azken duelurako.
Horrela, aurreko soulsborne jokoetako elementuen nahastea ikus daiteke bideo berrian. Elden Ringena da eskeletoa, bai, baina Dark Souls-en, Sekiro-ren eta beste FromSoftwaren tituluen elementuak aurkituko ditugu Nightreignen: armak, armadurak, mekanikak… baita etsaiak ere.
Egileen arabera, hiru jokalarien arteko sinergiak sortzea ezinbestekoa da gauaren aurrean garaipena lortzeko; horrela, pertsonaia mota anitzak eratzea sarituko du jokoak. Abilezia berezi ikusgarriak erakutsi dizkigute azken trailerrean: dirudienez, Elden Ringen baino botere handiagoak edukiko ditugu oraingoan.
Atzo hasi zuten beta probaldi itxia; zoritxarrez, ez ditugu irudiak edo bideoak ikusiko, konfidentzialtasun akordioa prestatu baitute parte hartzen dabiltzanentzat. Behin betiko bertsioan egongo diren zortzi pertsonaia mota desberdinetatik lau proba daitezke bertan.
DLCak ere edukiko ditu Nightreignek. Orain arte baieztatu gabe zeuden, baina jokoa argitaratu ostean eduki gehigarri berriak gaineratuko dituztela aipatzen dute japoniarrek bideoan. Elementu estetikoak izan daitezke soilik, baina agian espantsioren bat edo beste prestatzeko asmoa daukate.
Ez dugu askorik itxaron beharko, behintzat, joko osoan aritzeko: esan bezala, Elden Ring Nightreign maiatzaren 30ean merkaturatuko da. PlayStation 5, PlayStation 4, Xbox Series zein PC plataformetan erosi ahalko dugu.
Iruzkinak