Chibig estudio valentziarrak bi ordutan lortu du jarritako helburu ekonomikoa. 2027rako kaleratzea aurreikusten da.

Elusive aurkeztu du Chibig estudioak. Iragarpenarekin batera, bideojokoa garatu ahal izateko beharrezko dirua biltzeko Kickstarter bidezko finantzaketa kanpaina abiatu du talde valentziarrak.

Abiatu, eta, jarritako helburua lortu. Joan den asteazkenean ireki zituzten dohaintzak jasotzeko webgunea, eta bi orduko epean helmugara iritsi ziren, 40.000 euroak eskuratuta. Kontsola nagusi guztietan nahiz ordenagailuetan estreinatzea da helburua, orain.

Aurretik argitaratutako Summer in Mara edo Mika and The Witch’s Mountain zoragarrien antzeko bidea jarraituko dute Elusivekin: plataforma abentura koloretsua eta dibertigarria garatzen dabiltza. Oraingoan Ghibli Studio-ren Arriety filmea hartu dute inspirazio iturritzat; horrela, gizaki txikien munduan barneratuko gara, kokaleku erraldoietako erronkak gainditzea helburu izanik.

Zoe gaztearen rola jokatuko dugu: gizaki handiek alboratutako baliabideak hartu eta bere komunitatearentzako erabiltzen dituen esploratzailea. Etxeetan sartuta, egongelak, sukaldeak, komunak eta bestelako toki arruntak zeharkatuko ditugu, noski, pertsona ñimiñoaren ikuspuntutik. Beti ezkutuan, jauzi egiten, eskalatzen, sekretuak aurkitzen eta katu maltzurrengandik ihes egiten ariko gara, besteak beste.

Metroidvania egitura aurkituko dugu tituluan: hiru dimentsioko plataforma jokoa bada ere, mundua irekitzen joango zaigu abilezia eta objektu berriak desblokeatu ahala. Gainera, bi dimentsioko atalak ere ikusiko ditugu Zoeren abenturetan, baita borrokak ere: orratz ezpata erabili beharko dugu gure burua defendatzeko.

Diru bilketak aurrera dihardu, noski: albistea idazterako unean 148.000 euroak gainditu dituzte Valentziakoek. Jokoa finantzatzeko helburua lortuta, orain beste helmuga batzuk bilatzen dituzte Chibigekoek: jantziak eta bigarren mailako misioak desblokeatuta daude dagoeneko; orain, edizio fisikorako gehigarri bereziak zein minijokoak geratzen dira, diru gehiago biltzea lortuz gero. Ez litzateke zaila izan beharko, Kickstarterra bukatutzat jotzeko 26 egun geratzen zaizkie-eta.

Bideoek eta irudiek itxura ona badute ere, Elusiven garapena luzerako doa: 2027an argitaratzea aurreikusten dute, dena ondo badoa. PlayStation, Nintendo eta Xbox kontsoletan jokatu ahal izango dugu, baita PCan ere.