Playground Games-en fantasiazko abentura umoretsuaren aurrealfa bertsioa erakutsi dute.

Fable ez dugu aurten ikusiko. Craig Duncan Xbox Game Studios-eko zuzendariak jakitera eman duenez, ARPG abentura 2026ra geroratu dute.

Playground Games taldearen eskutik ikusiko dugun titulua 2020an iragarri zen; berez, 2025ean kaleratzeko asmoa zeukaten Xboxetik, baina pixkat gehiago itxaron beharko dugu. “Denbora pixkat gehiago eskainiko diogu, eta 2026an argitaratuko da”, dio Duncanek Xboxen podcast ofizialean: “Mereziko duela bermatu nahi dut, eta PGrengan konfiantza osoa daukat”.

Iragarpenarekin batera Fable berriaren aurrealfa bertsioaren irudi berriez gozatzeko aukera eduki dugu. Oraindik asko geratzen bazaio ere, erakutsitakoak izugarrizko itxura dauka orokorrean. Jokagarritasuna ikusten dugun lehen aldia da: aurretik argitaratutako bideoetan zinematikak ziren nagusi.

Itxarotea geratzen zaigu, hortaz, Fablen munduan berriro barneratzeko. Xbox, behintzat, nahiko indartsu dator aurten: Avowed merkaturatu berri, oraindik Doom: The Dark Ages eta South of Midnight geratzen zaizkio. Ez hori bakarrik: zurrumurruen arabera, The Elder Scrolls IV: Oblivion maitatuaren berregitea ere jaso beharko genuke aurten.