Lehen pertsonako ikuspegian Fallout originaleko Nekropolia zeharkatuko dugu. Bideojokoaren % 60 garatuta daukatela aipatzen du Alexander Berezin sortzaileak.

Zaleek sortutako Fallout: Bakersfield proiektuak bizirik dirau, eta aurrerapenak aurkezteko trailerra eskaini digu. Doom originala oinarri hartuta sortutako retro tiro jokoa eratzen dabiltza Alexander “Red888guns” Berezin eta Denis Berezin.

Orain bost urte baino gehiago erakutsi zuten Bakersfield lehen aldiz, sare sozialen bidez zabaldutako GIF irudiarekin. Lanean gogor dihardutela agerikoa da, azken bideoarekin tiroketak, arerioak eta kokalekuak xehetasun osoz erakutsi baitituzte.

Fallout 1en ezagututako Nekropoliko —Bakersfield, Kalifornia, alegia— kaleetatik zehar ibiliko gara lehen pertsonako tiroketetan. Fallout izanik, esplorazioa, RPG elementuak eta sekretu mordoa ikusiko ditugu, baita ghoul-ei, super mutanteei eta gainerako munstroei aurre egiteko beharrezko arma eroak.

GZDoom garapen motorea da, zehazki, Fallout: Bakersfield eratzeko erabilitako tresna. Ez da erreminta hau beste frankizia ezagunetako jokoak sortzeko erabiltzen den lehen aldia: aurretik Castlevania : Simon’s Destiny edo Wolfenstein: Blade of Agony ikusi ditugu. Joko komertzialentzat hartutakoa da, baita: aurretiazko sarbidean aurkitzen den Selaco interesgarria GZDoomekin prestatzen dabil Altered Orbit Studios taldea.

Berezinen proiektuarekin jarraituz, jokatzeko itxaron egin beharko dute zaleek: bideo amaieran ikus daitekeenez, Fallout: Bakersfielden % 60 garatuta eta prest dagoela diote egileek. Argitaratze data misterioa —edo txantxa— da, trailerrean ??.??.202? data agertzen baita.

 

CRPGetatik urrundu gabe

Alexander Berezinek Fallout FPSa prestatu nahi du, baina originalaren jokagarritasuna hartzen duen bideojokoa sortzen ari da aldi berean. Berea da New Blood argitaletxeak aspaldi iragarritako CRPG titulua: Fallout klasikoen estetika zein mekanikak hartzen dituen rol jokoa.

Izenik gabeko proiektuak, tamalez, ez dauka argitaratze datarik, baina garapena aurrera doala dirudi.