Birritan berandutu zen kirol simulagailu eta kudeaketa jokoa. Ez dute FM24 eguneratuko gaur egungo jokalariekin eta taldeekin.

Sega-k eta Sports Interactivek albiste txarrekin etorri dira futbolzaleentzat. Football Manager simulagailuaren 25 atala bertan behera uzteko erabakia hartu dute; horren ordez, hurrengo jokoaren garapenari ekin diote.

Webgune ofizialean argitaratutako prentsa oharrean barkamena eskatu dute egileek: “FM25 erreserbatu duzuen kopuru handiari, eskerrik asko zuon babesagatik, eta barkatu alboratuta uztearren”. Orain arte erabakiaren berri eman ezinik ibili direla aipatzen du taldeak, arazo legalen harira.

Oztopoz betetako garapen prozesua izan da FM25ena. 2024. urteko lehen hilabeteetan merkaturatzeko gogoak zituzten hasiera batean; 2024ko azarora berandutu zuten ondoren, azkenean aurtengo martxoan argitaratuko zutela iragartzeko.

Diotenez, “jokoaren hainbat alor espero bezala bukatu zituzten arren”, beste batzuekin arazoak eduki dituzte: “Jokalariaren esperientzia zein interfazea ez zeuden behar bezala”. Norabide zuzenean zebiltzala azaltzen dute, baina denbora gehiago beharko zutela erosleek espero duten mailara iristeko, eta jadanik berandu zela.

Nola gerta daiteke hau urtero atal berria jasotzen duen bideojokoen frankizian? Garapen motorea aldatzeko erabakia hartu zuten FM25ekin: Unity motorea erabiltzen hasi dira, eta, dirudienez, trantsizioa ez da erraza izan.

Oharrean aipatutakoak hasiera baino ez dira, izan ere: jokoa ohiko ezaugarrietako batzuk gabe kaleratzeko asmoa zegoen, betiko zaleak amorraraziz. Erreserben kasua ere nabarmentzekoa da, iazko azaro hasieran erreserbak abiatu, eta hortik egun gutxitara jokoa berriz berandutu baitzuten.

Ezeztatzeak aurrera egitea ahalbidetuko dietela diote orain. “Gure hurrengo argitalpenak helburuak betetzeko eta aurreikusitako kalitate mailara iristeko lanean gabiltza”.

Zaleek FM25 bertan behera geratzea aurreikusten zuten aspalditik; hori dela-eta, aurreko atala, FM24, eguneratzeko eskatzen izan dute askok, ikusi gabe geratu diren denboraldiko jokalarien eta taldeen informazioa gehituz. Horri buruz mintzatu dira Sports Interactivekoak: ez dute inolako gaurkotze ofizialik prestatuko.

FM frankizia kirol munduko simulagailuen artean arrakastatsuena da: FM24k, adibidez, 14 milioi jokalari baino gehiago elkartu zituela adierazi zuten pasa den urte bukaeran. Ez da harritzekoa, plataforma guztietan jokatu baitaiteke: kontsoletan, mugikorretan zein ordenagailuan argitaratu zuten.

 

…eta PC Futbol, zer?

Aspaldi heldu beharreko gaia zen PC Futbol 8 polemikoarena. 2024ko apirilean ezagutu genuen futbol taldeen kudeatzaile espainiarra euskaraz estreinatuko zela: hilabete horretan kaleratuko zutela adierazten zuten Una partida más estudiotik.

Lehen berandutzea apiril bukaeran ezagutu genuen… eta, tira, ordutik hona dozenaka geroratze jasan ditu. Argi geratu zen, duela asko, jokoaren arduradun nagusia iruzurretan zebilela: foro ofizialetan nahiz sare sozialetan jarratzaileak nahasten eta polemikak eragiten baino ez da ibili estudioaren jabea.

Hori horrela, jokoari ez genion inolako promoziorik ez publizitaterik eskaini nahi, kasua guztiz argitu arte, behintzat. Une honetan sortzailea desagertuta dabilenez, eta PC Futbol 8 alboratuta geratu denez, FM25en patu berbera jarraituko duela esan dezakegu.