Little Tail Bronx unibertsoko joko berria kontsoletarako eta PCrako sortzen ari da CyberConnect 2. Lurrean, zeruan… eta espazioan borrokatuko dugu oraingoan.

Fuga: Melodies of Steel 3ren argitalpen data iragarri du CyberConnect 2 talde japoniarrak. Maiatzaren 29an estreinatuko da RPG taktikoa.

Ikaragarrizko balorazioak biltzen dituen Fuga sagaren azken atala berrikuntza esanguratsuekin etorriko da. Animalia antropomorfikoz betetako munduan, haur talde bat gidatzea da gure helburua… gerratik salbatzeko eta bizirauteko.

Taranis izeneko tanke erraldoiaren barruan bizi da gure familia: honekin batera mundu mapako bazter batetik bestera mugituko gara. Tamalez, ezingo gara gerratik aldendu, eta txandakako dueluetan parte hartu beharko dugu. Haur bakoitza tankearen gune desberdinetara esleituko dugu honen funtzionamenduan laguntzeko; hots, umeenak izango dira gure txandak.

Erabakiek pisu nabarmena hartuko dute. Mundu latza eta gupidagabea da Fugarena: batzuetan ezingo ditugu ume guztiak salbatu… eta, are gehiago, hauek sakrifikatzea behar izatea ere gertatuko da. Arimen kanoia azaltzen zaigu trailerrean: pertsonen bizitza erabiliz tiro hilgarriak jaurtitzeko balio digun arma boteretsua. Lurrean, zeruan, eta baita espazioan ere, toki guztietan ibiliko gara oraingoan.

Dueluen artean narratiba sakona biziko dugu nobela bisualen estiloko mekanikekin: gure istorioaren egileak garela diote arduradunek. Harremanek sekulako garrantzia daukate jokoan, baina gure ibilgailua hobetzeko tarteak ere beharko ditugu.

Garatzaileek diotenez, ez da beharrezkoa aurreko jokoetan aritzea Fuga 3 ulertzeko. Little Tail Bronx unibertsoaren parte da Fuga: PlayStation 1eko Tail Concerto edo Nintendo DSko Solatorobo: Red the Hunter ezaguna, adibidez, unibertso berean kokatzen dira.

Fuga: Melodies of Steel 3 PlayStation, Xbox zein Nintendo kontsoletan eta PCan kaleratuko da maiatzaren 29an.