Astearteetan 17:30ean grabatuko da zuzenean; FM bidez astearte gauerdietan emango da. Bideojokoen albisteak, analisiak erreportajeak eta gehiago bilduko ditu beste behin.

Bosgarren denboraldiari ekingo dio gaur Game Erauntsia irratsaioak. Naiz Irratiaren FM uhinetan zein Twitch plataformako zuzenekoetan bideojokoak euskaraz lantzen dituen programa ohiko egiturarekin itzuliko da.

Damian Madinabeitia, Haritz Odriozola eta Lander Unzueta Game Erauntsia Elkarteko kideek gidatuta, saioa Game Erauntsiaren Twitch katean zuzenean grabatuko dugu astearte arratsaldeetan; grabatu eta astebetera, Naiz Irratian entzun ahalko duzue saioa astearte gauerdietan; bukatzeko, bideoak nahiz audioak entzungai zein ikusgai jarriko dira hainbat plataformetan.

Albistegia izango da, ohi bezala, saioaren atalik esanguratsuena: bideojokoen munduan jazotakoak ekarriko ditugu bertara, berririk interesgarrienak nabarmenduz: azken estreinaldiak, ezustekoak nahiz zurrumurruak entzungo dituzue.

Euskal bideojokoek eta garatzaileek, nola ez, txoko berezia edukiko dute, gure herriko lanak ezagutzera emateko txokoa baita Game Erauntsiarena; ez hori bakarrik, euskaratutako jokoen berri edukitzeko toki aproposa ere izango da.

Analisien tartean, gainditu, edo, behintzat, sakon gozatu ditugun bideojokoei buruz ariko gara. Kritika edo iritzi hutsa eskaini baino, landuko ditugun tituluen ibilbidea, testuingurua eta oinarriak aztertzeko gunea osatu gura dugu. Bukatzeko, erreportajekin eta elkarrizketekin mundu berezi honen barnean aurkitzen diren denetariko gaiak jorratuko ditugu.

Zuzenean grabatzen gabiltzala jarraitzaileen ekarpenak izugarri eskertzen ditugu; izan ere, ikusleek txatetik parte hartzeko aukera dute. Etorri gurekin gustura egotera eta zaletasun hau partekatzera!

Denboraldiko lehen saioan abuztuan egindako iragarpen eta aurkezpen handiak errepasatuko ditugu: Gamescom azokak berri interesgarriak ekarri dizkigu, baina Nintendo-koek ere zuzeneko berezi pare bat egin dituzte. Irailean sartu berri garenez, hilabeteko estreinaldien agenda ere aterako dugu. Eta, noski, PlayStation-ekoen Concord bideojokoaren hondamendia aipatuko dugu.

 

Ordutegiak

Denboraldi berri bakoitzarekin ordutegi aldaketekin gatozela dirudi. Astero saio bakarra grabatuko dugu, ohi bezala: Twitcheko zuzeneko emanaldiak astearteetan 17:30ean izango dira. FM uhinen harira mugitzen zaretenok, berriz, astearteetan 00:00etan entzun gaitzakezue Naiz Irratian.

Saioren bat galdu duzuela? Ez arduratu. Plataforma sorta zabalean entzun dezakezue noiznahi —aurreko denboraldi guztiekin batera!—:

Zuon zain egongo gara!