Abenduaren 31ra arte egongo da irekita bozkatzeko epea. Oparia zozkatuko dugu parte hartzen duzuenon artean!

Ahaztu urteko bideojokori onenak bozkatzeko dauden nazioarteko ekimenez eta ekitaldiez, garrantzitsuena hemen baitago: Game Erauntsia Sariak bozketaren 2024ko edizioa abian da!

Urtero lez, aurtengo titulurik onenak saritzea du helburu Game Erauntsia Elkarteak antolatutako ekimenak. Lan hori euskal bideojokozaleen komunitatearen esku egongo da: zuok hautatuko dituzue irabazleak.

2024a ezustekoz josita egon da; egia esan, ez da saga eta frankizia handien urtea izan, baina altxor benetan bereziak jaso ditugu. Horren adibide dira Black Myth: Wukong, Astro Bot, Helldivers II edo Metaphor: ReFantazio. Dena den, aspaldiko joko handien jarraipenak edo berregiteak ere igaro dira gure gailuetatik: Final Fantasy VII Rebirth, S.T.A.L.K.E.R. 2: Shadow of Chornobyl edo Indiana Jones and the Great Circle bideojokozaleak poztera etorri dira aurten.

Espantsioa bada ere, aurtengo titulurik arrakastatsuena eta baloratuena da, zalantzarik gabe, Elden Ring ikaragarriaren Shadow of the Erdtree eduki gehigarria. Halakoak kontuan hartzen hasita, sarbide goiztiar oso interesgarri pare bat ere heldu zaizkigu: Hades 2k dagoeneko milaka jokalari maitemindu ditu, baina Path of Exile 2k bere ibilbidea hasi baino ez du egin.

Gure kasuan, ez dugu hautagai zehatzik izendatuko: zuok izendatuko dituzue, inolako mugarik gabe, kategoria bakoitzeko aukerak —2024an argitaratutako jokoak izatea eskatzen dugu bakarrik, Shadow of the Erdtree nahi duzuen tokian sar dezakezue, beraz —.

Gure webgunean prestatutako galdetegian bota ditzakezue zuon hautagaiak; horrela, komunitatearekin urteko bideojokorik onenaren, indie onenaren edo multijokalaririk onenaren sariak banatu nahi ditugu, besteak beste. Bozkatzeko epea urte bukaeran itxiko dugu, abenduaren 31n.

 

Beti bezala, etxekoak ardatz!

GE sariekin ez gara ohiko bideojokoetara mugatu nahi. Euskal Herrian sortutako eta kaleratutako lanak nabarmendu gura ditugu, beste urte batez lan zoragarriak merkaturatu baitituzte bertoko garatzaileek.

Munstro, One Last Breath, Voodoo Strikers, Arima Lodge, Slap That, Chrono Club – Race Against Time, MouseVentures, Abyssal, Crossy Tomato: Ultimate Run eta Live Cycling Manager 2024 jaso ditugu 2024an, baita Evil Nun: The Broken Mask-en Switch kontsolako bertsioa ere. Ezin gaitezke ahaztu, jakina, Euskal Game Jam 2 topaketan argitaratutako bederatzi bideojokoez.

Euskal jokorik onenarena ez da gurera begira banatuko dugun sari bakarra, ordea: euskaratze eta itzulpen lan bikainez gozatu dugu, eta horiek nabarmentzeko zein berriz ezagutzera emateko aukera ezin hobea dugu sariokin. 33 dira, eta azkar esaten da, 2024an euskaratutako bideojokoak! Eskerrik asko bihotzez hau posible egin duzuen guztioi.

 

Opariekin

Ohiturekin bukatzeko, parte hartzaileen artean oparitxoa banatuko dugu: 20 euroko opari txartela zozkatuko dugu inkesta modu egokian bete dutenen artean. Irabazleak hauta dezake txartela zein plataformatarako nahi duen.

Sarituak bideojokoen irabazleekin batera ezagutzera emango ditugu datorren urte hasieran!

 

Game Erauntsia Elkartea

Zerrendan aipatutako bideojokoren batek interesatzen badizu, edo hauei buruz sakon hitz egiteko gogoak badituzu, gogoratu Game Erauntsia webgune hau baino askoz zabalagoa dela. Bideojokoei buruz eztabaidatzeko, elkarrekin jokatzeko, eta, orokorrean, zaletasun honetaz euskaraz gozatzeko talde desberdinak ditu euskal bideojokozaleen komunitateak!

Lehenik eta behin, gure Telegram taldea aipatu behar da. Bertan jo eta su ibiltzen gara industriako azken berriei buruz hitz egiten, jokoak gomendatzen edo bitxikeriak partekatzen, baita Twitch-eko euskarazko zuzenekoak zabaltzen ere. Talde orokorraz gain, beste hainbat lanetarako bilguneak ditugu: esate baterako, itzulpenekin laguntzeko txata.

Bigarrenik, ezin dezakegu gure Discord zerbitzaria kanpoan utzi. Eztabaidarako lekua dagoen arren, partidak antolatzeko tokirik aproposena da: bertan multijokalari bideojokorik ezagunenentzako taldeak aurki ditzakezu.

Hirugarrenik, Game Erauntsiaren sare sozialak aipatu behar ditugu. Mastodon, Instagram, Twitter zein Facebook plataformetan gaude: bertan gure blogeko azken artikuluak zabaltzen ditugu, baita gure ekimenen berri eman ere! Gainera, Twitch, Peertube.eus eta Youtube plataformetan aurkituko gaituzu zuzenekoak egiten eta bideoak igotzen!

Bukatzeko, Game Erauntsia irratsaioa nabarmentzea geratzen da! Naiz Irratiaren bideojokoen saioa entzuteko —eta ikusteko— hainbat bide daude. Denboraldi guztien bideoak Youtuben ditugu, baina irratsaioak Naiz Irratiaren webgunean, zein Spotify, Ivoox eta Apple Podcasts plataformetan entzun ditzakezu!

Eskerrik asko aurten gurekin izan zareten guztioi: komunitatea pixkanaka hazten doa, geroz eta euskal bideojokozale gehiago elkartuz. Ez dugu bukatu aurtengoekin oraingoz, baina, 2025ean, are gehiago!