Jolt fisikak, jokoak martxan daudela editatzeko aukerak eta denetariko optimizazio lanak prestatu dituzte.

Godot proiektuak gaurkotze handia jaso du. 4.4 bertsioarekin hobekuntza orokorrak inplementatu dituzte kode irekiko garapen motorean.

Tresnaren arduradunek “bizitza kalitaterako hobekuntza ugari” aipatzen dituzte webgune ofizialean prestatutako artikuluan: “karga denbora murriztuak, geldialdi gutxiago edo sinplifikatutako prozesuak” nabarmentzen dira, “optimizazio guztiak aurkitzeak denbora daramala” azpimarratuta.

Horiek gutxienekoak dira, baina, erabiltzaileek aspalditik espero zituzten ezaugarriak inplementatu baitituzte. Jolt fisiken gehigarria da horietako lehenengoa: aldez aurretik Godot erabiltzen zuten askok erabilia, oraindik aurrera ofizialki eskainiko dute motorearekin.

Zure bideojokoa editorean probatzen zabiltzala hau unean eraldatzeko aukera daukazu, gainera. Kamera zein objektuak mugi ditzakezu, besteak beste, jokoa martxan zein etenda dagoela. Pantaila bakarra erabiltzen duten garatzaileek, bestalde, bateratutako joko leihoak ikusiko dituzte orain: prozesuak banatuta ageriko dira, karga optimizatuz, baina leiho bakarrean erakutsita.

Ubershader-ak dira 4.4 bertsioaren beste berritasunetako bat. Jokoetako shader desberdinak (itzalak eta hauen efektuak) ezaugarri guztiekin aurrekonpilatuta daudenean deitzen zaie ubershader: horiei esker, objektu edo efektu berriak agertzerakoan ematen diren izozte txikiak saihestea bilatzen da.

Eszenen zuhaitzaren sistema eraberritua, objekturik gogokoenak gordetzea, Camera3Daren aurreikuspena… hobekuntzen eta berritasunen zerrenda amaigabea da: guztiak webgune ofizialean aurkituko ditugu, azalpenen artikulu txikiekin batera.

Bi zein hiru dimentsioko jokoak garatzeko erreminta aproposa izan daiteke Godot. Motorea erabiltzen ikasteko dokumentazio landua nahiz ikastaroak ere eskaintzen ditu komunitateak. Adibide bezala, orain gutxi analisia eskaini diogun Dome Keeper bikaina garapen motore honekin sortutakoa da.

Godot proiektuaren webgune ofizialetik jaitsi daiteke doan; ez hori bakarrik, Steam eta Itch.io saltokietan ere eskaintzen dute eguneraketak errazteko asmoarekin.