The Legend of Zelda: Tears of the Kingdom-en istorioan sakonduko du oraingoan. Switch 2ko esklusiboa izango da.

The Legend of Zeldaren Hyrule Warriors azpisagak atal berria jasoko du neguan. Hyrule Warriors: Age of Imprisonment iragarri dute Nintendo eta Koei Tecmo japoniarrek.

Aurreko Hyrule Warriors: Age of Calamity-ren jarraipena izango da. Hori horrela, musou mekanikak eta elementuak ditu ardatz: ehundaka arerioren aurka egingo dugu gure heroiek gidatutako armadekin batera.

Age of Calamityk Breath of the Wild-en istorioa eta elementuak hartzen bazituen, Age of Imprisonment berriak Tears of the Kingdomenak erabiliko ditu. Zelda printzesaren abenturetan oinarrituko dela dirudi: bere bidaia eta ezagutzen dituen pertsonaiak azalduko zaizkigu.

Zeldarekin jokatuko dugu berriro, hortaz. Rauru erregea ere ageri da kontrolatzeko pertsonaien artean, baina askoz gehiago egotea espero da, hori izaten baita Warriors erako bideojokoen muina. Berezko mugimenduekin eta erasoekin, botere hilgarriak erabiliko dituzte gudu zelaia kontrolatzeko.

Hyrule Warriors: Age of Imprisonment Switch 2an estreinatuko da esklusiboki. Kaleratze data zehatzik gabe, negurako aurreikusten dute arduradunek.