YCJY Games indie estudioak herrialdea zeharkatzera animatuko ditu jokalariak pixel art ederrarekin.

Keep Drivingek indie proposamen interesgarria ekarriko digu gaur. Auto gaineko ziega abentura dela esan daiteke, RPG mekanikak elkartuz premisa ezagun bezain bitxia proposatzeko: nostalgiaz gainezka egiten duen tituluan herrialdea zeharkatu beharko dugu aspaldiko lagunarekin geratzeko.

Ez da horren erraza izango, hainbat faktore kontuan hartzekoak izango baitira. Gure protagonistaren energia zein egoera zaindu beharko ditugu, baita, argi dagoenez, toki batetik bestera eramango gaituen autoa ere.

Horrela, dungeon crawler, JRPG, nobela bisual eta kudeaketa ezaugarriak uztartzen dira Keep Drivingen. Abentura fase edo joko mota desberdinetan banatuko da. Txandakako borrokak biziko ditugu, kakotx artean, traktoreak edo txirrindulariak aurreratzeko; bestalde, hiriak esploratzerakoan lehen pertsonan lauki saretik zehar mugituko gara; edo, adibidez, gure abenturara gehi daitezkeen bidaiariak batu ditzakegu, denetariko egoerak sortuta nahiz hobariak edo penalizazioak jasota.

Bizirauteko zein autoa mantentzeko dirua beharko dugu baita, eta hainbat lanetan aritzea izango da bidea. Oinarrien nahaste honen atzean Oregon Trail edo Faster Than Light bezalako obra mitikoak daudela diote YCJY Gamesko egileek.

Amaiera bikaina emateko, jokoaren pixel art grafikoak aipatu beharra daude. Xehetasunez betetako eta prozeduralki sortutako mundu zoragarria prestatu dute garatzaileek, 2000. hamarkadako girotzea bereganatuta.

Bideojoko motza da: lau ordutan bidaia bakoitza bukatzeko modukoa izango da. Halere, bukaera desberdinak eratu ditu YCJY Gamesek, birjokagarritasuna sustatuz. “Lasai hartu, oraindik gaztea zara-eta”.

Gaur estreinatuko da Keep Driving PCan. Proposamenak erakartzen bagaitu, erosi aurretik doako demoa probatzeko aukera daukagu Steam saltokian.