Bola arrosaren lasterketa jokoak oinarrizko mekanikak mantendu ditu, titulu teknikoa eta dinamikoa prestatuz.

Kirby Air Riders azaroaren 20an estreinatuko dela jakinarazi du Nintendok. Switch 2 kontsolako esklusiboa izango da.

Iragarpena Masahiro Sakurai jokoaren zuzendariak —Kirbyren sortzailea, baita Super Smash Bros. borroka sagarena ere— egin du, lasterketa tituluari eskainitako Direct emanaldi bereziarekin batera. 45 minutuko iraupenarekin, jokoaren gako guztiak laburbildu zituen arduradunak.

GameCube kontsolan estreinatutako Air Ride originalaren jarraipena izanik, honen oinarri eta zutabe guztiak mantenduko ditu Ridersek. Izenburu berria sinpleki azaldu du Sakuraik: Kirby ez ezik, beste hainbat gidariren artean hautatuko dute jokalariek oraingoan. Bola arrosaren ohiko lagunak eta etsaiak, noski: Bandana Waddle Dee, King Dedede, Meta Knight edo Kawasaki txefa azalduko dira jokoan.

Makina eta gailu anitzen gainean lehiatuko dituzte lasterketak. Hauek automatikoki azeleratuko dutenez, biratzeaz arduratuko dira jokalariak; hor dago koxka, ordea, turbo karga erabiltzea ezinbestekoa izango baita bai biratzerakoan, bai azkarrago joaterakoan.

Funtsean mekanika sinplea bada ere, teknika ugari biltzen ditu Air Ridersek. Gainera, ibilgailuek planeatzeko aukera daukate: makinaren noranzkoa zaintzea derrigorrezkoa izango da turboak eta bestelakoak lortzerako orduan.

Air Riden botoi bakarra erabiltzen zen lasterketetan, turbo kargarena; bigarren atalean, baina, bi botoi erabiliko ditugula aurreratu du Sakuraik. Eraso bereziarena da bestea: betetzen doan barrarekin batera erabiliko dugu, pertsonaia bakoitzak egin dezakeen berezko ekintza gauzatzeko. Gehienak erasoak dira, beste gidariak jotzeko aukera baitago.

Horri lotuta, zirkuituetatik sakabanatutako arerio arruntak xurga ditzakete gidariek. Ez da Kirbyri mugatuta egongo: gainerako pertsonaiek ere botere desberdinak lortuko dituzte munstrotxoak harrapatuta.

Air Ride izeneko modalitatean lasterketa normalak lehiatuko dira, baina City Trial maitatua ere bueltan da. Joko mota honetan, bost minutu edukiko ditugu gure ibilgailua zein pertsonaia hobetzen joateko mundu irekiko mapan zehar. Tartean, desafioak, minijokoak eta erronkak ere agertuko zaizkigu: hauek gaindituta estatistikak are gehiago hobetuko ditugu. Denbora agortzerakoan, estadiora jo beharko dugu gainerako lehiakideekin batera azken proba jokatzeko; egia esan, ez dira zertan lasterketa arruntak izango, bestelako probak ere azalduko baitira.

Lasterketa joko originalak ez zuen arrakasta handirik lortu, tamalez, baina jokatu zutenek oroitzapen polita daukate Air Riden inguruan. Jarraipenaren marketing kanpaina indartsuagoa bada ere, ikusteko dago Air Ridersen harrera zer nolakoa izango den; izan ere, Switch 2arekin batera ekainean estreinatu zen Mario Kart World-en aurka lehiatuko du zuzenean Kirbyk, eta irailean Sonic Racing CrossWorlds ere ikusiko dugu, Switch originalerako bada ere.

Kirby Air Riders azaroaren 20an kaleratuko da Switch 2 kontsolan.