Lasterketa joko zoroan ibilgailu hegalari desberdinak zein Kirbyren botereak erabiliko ditugu.

Nintendo Direct aurkezpenean Switch 2rako askotariko bideojokoak ikusi ditugu, baina ezuste handienetako bat Masahiro Sakuraik eta bere Sora Ltd. taldeak eman digu Kirby Air Ridersekin. 2025ean Nintendoren kontsola berrian kaleratuko du.

Zinematika baino ez dugu ikusi. Hala eta guztiz ere, 2003ko Kirby Air Ride originalaren pausoak jarraitzen baditu, lasterketa joko ero zein berezia garatzen dabiltza Sorakoak.

GameCube kontsolako originalean ibili ez zaretenontzat, arkade mekanikak biltzen zituzten lasterketak ziren Kirbyrenak. Berezitasun nagusiena kontrol motaren aldetik zetorren; izan ere, izarrak zein bestelako ibilgailuek euren kabuz egiten zuten aurrera… gure lana balazta zanpatzea zen, aldi berean, turboa kargatzeko.

Bola arrosaren jokoa izanik, nola ez, arerioak eta euren botereak xurgatzeko ahalmena edukitzen genuen. Kirbyren transformazioek ahalmen desberdinak eskaintzen zizkiguten, objektu gisa funtzionatuz.

Grand Prix eta lasterketa arruntez gain, City Trial izeneko modalitate maitatua zeukan Air Ride originalak: epemuga zehatz batean modu askean mugit behar ginen hiri batetik zehar gure estatistikak zein ontzia hobetzeko helburuarekin. Denbora agortzerakoan, lasterketa batean parte hartzen genuen lortutakoekin.

Argi dagoenez, arkade lasterketa tituluen artean benetan berezia izan zen originala, eta Kirby Air Riders berriarekin hutsune hori betetzera datoz Sakurai eta lankideak.

Eguna zehaztu gabe geratu bada ere, aurten kaleratzeko asmoa badago, laster ikusi beharko genuke jokagarritasuna… agian, gaur edo bihar: Nintendo Treehouse: Live zuzenekoak abiatuko dituzte bi egunetan, 16:00etan.

Kirby Air Riders 2025ean estreinatuko da Switch 2 kontsolan.