Louis Schnellbach, Ubisoften bideojokoen garatzailea eta euskara ikaslea

Urtzi Odriozola | 2017/06/23 10:00 BerriakKomunitateaElkarrizketak



Louis Schnellbach (@xipiryon) Fontainebleaun jaio zen 1991. urtean eta arrez gero Frantziako herri ezberdinetan (Bassin d'Arcachon, La Rochelle, Normandie, Pau, Paris...) bizi izan da bere haurtzaroan (batez ere bere gurasoen lanagatik), baina azkenean Euskal Herrian, Senperen aurkitu zuten beren txokoa.

Aldi horretan ez zuen euskara ikasteko aukerarik ikusi (batez ere konplexutasun handiko hizkuntza iruditzen zitzaiolako), baina orain heldu dio lan horri eta "euskara ez dela 'horren' konplexua, oraingoz behintzat" aitortu digu.

Batxilergoa amaitu ostean, Angelun unibertsitateko informatika ikasketak egin zituen 2 urtez eta ondoren, 3 urtekoa eta aurrekoaren osagarri den informatikako lizentziaturako azken urtea Paun. Ikasketa hauek amaitu ostean Angoulêmen kokatzen den ENJMIN (Ecole Nationale des Jeux et Médias Interactifs Numériques) eskolan masterra egiteko onartu zuten.

Aitortu digunez, bere ustez Frantzian existitzen den bideo joko eskolarik onena da, benetako profesionalek egiten dituzten proiektuetan aritzen baitira. Bertan dagoeneko joko diseinatzaile, audio diseinatzaile, diseinatzaile grafiko, ergonomista eta ekoizleak direnekin lan egiten dute eta hori abantaila handia da bere esanetan "bizitza errealean horrela funtzionatzen baitu" kontuak. Bideo jokoak nola egin ikasi nahi izanez gero (eta Frantzian ikasteko prest egon), bertara joatea aukera ona litzatekeela esan digu.

Bertan egin zituen bere aurreneko hainbat lan eta horietatik Event[0] proiektua gainera, garai hartan berarekin lan taldean zeuden erdiek eskola amaitu ostean berriz remasterizatu eta Steamen daukate gaur egun. Louisek eskola proiektua zen bitartean bakarrik egin zuen lan joko horretan.

Behin diplomatura lortuta, 6 hilabetetako praktikak egiteko onartu zuten Parisko Ubisoften, Just Dance 2015 jokoaren garapenean parte hartzeko. Eta ondoren, urte eta erdiz aritu zen leku berean Ghost Recon Wildlands jokoaren garapenean.

Baina beti gustatu izan zaio mundua ezagutu eta atzerriko lan esperientziak probatzea eta kanpora mugitu ahal izatea eskatu zuen. Horrela onartu zuten Quebec-eko Ubisoften. "Orain lanean zerekin ari naizen ezin dizut esan" aitortu digu, baina ondorengo galderak erantzuteko prestutasuna izan du.

1.- Zure lana zertan datza? Nola egiten duzu lan egunerokoan?

Orokorrean programatzailearen lana, jokorako nahi ditugun ezaugarri ezberdinak sortzeko (C++ moduko) kodea idaztean datza. Mota askotako joko programatzaileak daude: adibidez gameplay, UI, online, motore, tresna... garatzaileak. Irudikatu "motorra" mundu guztiak erabiltzen duen kaxa beltz bat bezala, baina nola funtzionatzen duen jakin gabe. Gure lana guztia ondo dabilela ziurtatzea da eta horrela besteek jokoa guk egindako motorraren gainean eraiki dezaten ahalbidetzea (Unity3D edo Unreal-ekin egingo zenukeen bezala adibidez). Nahiz eta gameplay programatzaileak ez duen zertan motorrak guztiz ondo nola funtzionatzen duen jakin, badakite hau eta bestea erabil dezaketela. Baina barneko xehetasun guztiak motor garatzaile taldeak kudeatzen ditu.

Nire egureroko lana kodea aztertu, beharrezkoa den ezaugarriak zein diren ikusi eta inplementatu, matxurak konpondu eta araztu eta errendimendua hobetzea da :)

2.- Jokoa paperean dagoenetik, zure eskuetara pasatzen den arteko prozesua nola da labur azalduta?

Prozesua askotan berdina da, baina zenbat eta estudio handiagoa izan, orduan eta jende gehiago dago prozesuan.

Normalean, hasierako ideia bat dago, kontzeptu oso sinple bat. Honi prototipoa deitzen diogu: ezaugarri nagusiak bakarrik, grafiko sinple batzuk, musikarik gabe etabar...

Behin ideia onartuta, benetako erronka hasten da:

  • Joko diseinatzaileek jokoa hobetzeko lan egiten dute: zer izan daitekeen egiteko dibertigarria, zer ez den, pantaila nola pasa daitekeen, zeintzuk diren etsaiak...
  • Artistak irudiarekin hasten dira lanean: pertsonaiak, munstroak, inguruneak, posterrak, 3D modeloak, animazioak eta antzerakoak egiten.
  • Pantaila diseinatzaileek zailtasun maila egokia duten pantailak sortzeaz arduratzen dira, jokalaria mundu horretan ez dela galduta sentituko ziurtatzeko...
  • Audio diseinatzaileek musika konposatzen dute, soinu efektuak (FX), ahots antzezpenerako grabaketa sesioak egin...
  • Marketing arduradunek merkatua eta konpetentzia kontutan izanda jokoak salneurri egokia izango duela ziurtatuko dute
  • Programatzaileek personaia nagusia eta munduaren arteko elkarrekintza guztiak posible egiteko kodea idatziko dute

Hori joko sorkuntzaren zati txiki txiki bat baino ez da, egia esan, ezingo nizuke dena esan. Imaginatu proiektu berdinean lanean ari diren 400 pertsonen lana kontatu beharko banizuke! :D

Prozesua benetan begizta baten modukoa da: ideia batekin hasten zara, hobekuntzak izanten dituena, findua, probatua, eta behin onartuta, beste ezaugarri bat hasten zara lantzen.

3.- Ubisoft oso enpresa ezaguna da gurean, lan askotan jolasteko aukera izan dugu. Zeintzuk izan dira garapenean parte hartu duzun esanguratsuenak?

Lehen esan dudan moduan, Just Dance 2015 eta Ghost Recon Wildlands jokoetan lan egiteko aukera izan dut. Oso interesgarria izan da hori, zeren, bi proiektu hauek bi jokalari mota  guztiz ezberdinentzat zuzenduak izan dira, biak ere joko motor eta joko konplexutasun ezberdinarekin.

4.- Esan daiteke beraz, pertsonaia, izaki, ibilgailu etabarren izaera zure eskuetan dagoela? Nola sentitzen da bat, jainko txiki baten lekuan?

Hori errealistagoa izan daiteke proiektu txikietan, pertsona gutxik proiektu osoan lan egiten dutenean. Ubisoften, hainbeste jende dago non, eremu zehatz batean bakarrik lan egin dezakezun...

Baina proiektu paraleloetan bai, hori benetan sentitu dudan gauza bat da. "Kode lerroekin bakarrik" zerbait sortu dezakeen Jainko baten antzera izatea!

"Algoritmo orokor" eta "neurona sareak" bezalako gauzak probatze ibilia naiz eta guztia bere kabuz ikasten eta bera bakarrik hazten zen prototipo txiki bat egina dut. Zirraragarria eta beldurgarria izan da.

Pentsatzen dut, No Man Skies-en lan egin duen taldeak ere adibidez horrelako zerbait sentitu behar izan duela :)

5.- Joko baten motorra ondo egiteak esan daiteke arrakastaren bermearen zatirik handienetarikoa dela. Ados zaude?

Joko motor on bat ez da joko arrakastatsu baterako gakoa, baina inpaktu ikaragarria du jokoaren garapen ona baldintzatzerako orduan. Jokoaren motorra ona bada, jokoan bertan kontzentratzeko gai izango zara eta gauza interesgarri gehiago egiteko gai izango zara. Apurtutako joko motor batekin ere egin dezakezu jokoa, baina zaila izango da eta ziur denbora gahiago beharko duzula.

Gauza da, joko motor on bat egiteak jokoa bera egiteak bezain beste denbora eraman diezakezula. Adibidez, "The Division" egiteko erabilitako joko motorrak Snowdrop izena du. 3 edo 4 urte behar izan ziren garatzeko eta hala ere beti dago zerbait hobetzeko!

6.- Zer esango zenieke bideojokoak eta bortizkeria lotzen dituztenei? Beste hainbat arte distiplina ez bezala, bideojokoek prestijioa falta dute?

Lehendabizikoz komikiak agertu zirenean, gaizki ikusiak izan ziren. Gaur egun bideo jokoak ikusten diren bezala.

Jakina da 12 urteko haur bat Call of Duty jokoetan jolastea ez dela gauza ona, eta zoritxarrez hori oso ohikoa da. Baina bideo jokoak besterik gabe ezin dira bortizkeriaren arduraduntzat jo. Zer esan dezakegu TB, YouTube, Netfilx etab.-etako telesail bortitzez?

Ziur ez duela gauzak hobetzen laguntzen, baina "jendea biolentoa bada, bideo joko bortitzengatik da" esatea errua errez bota diezaiokezun errundun bat aurkitzeko modu bat besterik ez da.

Bideo jokoa oso media gaztea da (30 urte baino gutxiagokoa!) eta guztia azkar eboluzionatzen ari da. Jendeak ez ditu bideo jokoak duela 5 edo 10 urte ikusten zituzten bezala ikusten eta hori ona da! :D

7.- Bideojokoak kultura dira?

Niretzat, bideo jokoak, eginak izan diren kulturaren luzapen bat dira. Artea izan daitekeen bezala.

Esan dezakezu Flappy Bird edo Candy Crush ez direla joko "kulturalak", baina jendeak jokoetara nola jolasten duen irudikatzen dute. Eta hau kulturaren parte da.

Hau gizarte bakoitzak bere modura garatu duen kontu bat da. Bestela konparatu AEB, Europa edota Asiako bideo jokoak!

Eta kultura ezezagunekin (ez behintzat munduan oso zabaldutakoekin) erlazionatutako jokoak aurkitzeak poztu egin nau. Afrika edota Inuit kulturan oinarritutako hauek adibidez. Sorgina - A Tale of Witches ere ez nuke aipatu gabe utzi nahiko :D

8.- Esaten da oraindik emakumeen papera anekdotikoa dela jokoetan eta berdintasunerako asko dagoela. Zuk nola ikusten duzu zure inguruan? Emakumeek presentzia eta garrantzia gero eta handiagoa dutela uste duzu?

Programazioaren eremuan hori oraindik egia da, oso emakume gutxi daude. Esango nuke %5 bat edo direla.

Emakume askoz gehiago dauden lanak daude, baina oraindik ere, %50-50tik oso hurrun gaude nahiz eta emakumeek industria honetan zilegizko lekua dutela frogatzeko gero eta esfortzu handiagoa egiten den. Adibidez, Quebeceko Ubisoft, neska gazteei nola programatu eta industrian lan egitea nolakoa den erakusten saiatzen da. Eta hori urrats ona da :)

Benetan espero dut jendeak jazarria izan gabe, gamergatearekin gertatu ez bezala, gero eta emakume gehiago ikustea industrian leku handiagoa hartzen.

9.- Aktualitateari lotuta berriz, orain dela gutxi ospatu da E3a. Nola bizi izan duzue zuek? Zein da gehien esperotako jokoa?

Inoiz ez dut izan bertan egoteko aukera, steaming bidezko kanaletatik bakarrik jarraitu ahal izan dut (baina errazagoa da Quebecen, Europan baino ordu diferentzia gutxiago baitago).

Momentu honetan irrikaz espero dudan jokoa, Crash Bandicoot seriearen erremasterizazioa da. Hori zoramena izango da :D

Eta Shadow of the Colossusen erremasterizazioa ere zoragarria da baita!

10.- Gure jarraitzaileetako batzuk zera galdetu digute... Beyond Good and Evil 2 noizko?

Esan dezakedan gauza bakarra Montpellieren garatzen dutela da. Ubisoft barruan ere ez daukagu informazio askorik horri buruz, sentitzen dut!

11.- Ingelesez eta Frantsesez dakizu, baina euskara nolatan hasi zara ikasten? Zerk bultzatu zaitu?

Euskara ikastera bultzatu ninduena nire lagun gehienak eta nire emaztea bai euskaraz eta baita frantsesez ere erraz aritzen direla izan zen. Eta nire aitaginarreba ere duela gutxi hasi da berriz ikasten... Beraz momentu ona zela pentsatu nuen! Eta egiari zor, euskara ez da "horren" konplexua, oraingoz behintzat :)

12.- Askotan saiatu gara zuen antzeko garapen etxeekin harremanetan jartzen modan dauden jokoak euskaraz izan ditzagun lortzeko. Baina, hiztun kopurua dela eta interes gutxi azaldu izan dute itzulpenak egiteko. Aukerarik ikusten duzu noizbait Ubisoften jokoak ere euskaraz izateko?

Uste dut ez dela inoiz AAA estudio handien euskarazko itzulpenik izango, diru hori askotan beste zerbaitetan gastatzen baita. Ez daukat inongo zifrarik baina adibidez, azken aldiko jokoek arabiarra bezalako zenbait hizkuntza handi falta dituzte. Zenbat eta joko handiagoa, orduan eta testu / ahots gehiago dauka eta gero eta garestiagoa da hizkuntza guztietarako itzulpenak eta grabazioak egitea...

Beraz zoritxarrez ez dut uste AAA jokoek euskarazko itzulpenik argitaratuko dutenik...

Harrituta geratu nintzen orain dela urte batzuk Minecraft euskaraz zegoela ikusi nuenean, baina gero konturatu nintzen komunitatea izan zela berau itzuli zuena eta hau ezin da joko denekin egin...

Nire ametsetako bat Iparraldean estudio bat sortzea da eta euskal mitologian (kultura eta hizkuntza zabaltzeko modurik onena) oinarritutako MMORPG moduko bat egitea. Jende, denbora eta diru asko behar duen zerbait da... baina agian egunen batean... :)

Game Erauntsia facebook


Iruzkinak (2)

Xuban Eka. 23, 2017, 11:33 a.m.

Oso interesgarria!

Urtzi Odriozola Eka. 23, 2017, 2:53 p.m.

Bai, benetan ere eskertzen da honelakoak irakurtzea!

Mesedez, sartu iruzkina utzi ahal izateko.

143
Kide

11
Jolasten

38
Online

Azken erantzunak

Aitor Uzt. 7, 2017, 12:29 p.m.

Crackdown 3-ak oso itxura ona dauka, nahiz eta aurreko bi jokoak jolastu ez ditudan. Hala ere, istorioaren jarraipena da ala joku bakoitzak istorio...
E3 2017ko hitzaldiak eta jokoak

Igor Okina Eka. 25, 2017, 12:38 a.m.

Topiko azkotxo ez? Argi dago ordenagalua ez dala kontsolak bezain sinplea, baƱa ez da hain konplikatua bez. Azken urtetan beintzat, dana itxen dotz...
Kontsolazale eta PCro batzuen topaketa Infernuan

Igor Okina Api. 10, 2017, 6:51 p.m.

Benetan eskertzen da. Ia etraejiako joko geixau euskeratzen dian. Mesedez, ahal badozue abixau itzulpena ofizialki aplikatzen danian.
0A.D. estrategia jokoa guztiz euskararatu dugu!!