Assassin’s Creed Shadows, Atomfall, The First Berserker: Khazan edo Xenoblade Chronicles X jasoko ditugu egunotan.

2025. urtea indartsu hasita, martxoan barneratzeko unea da… baina zer aurkituko dugu bideojokozaleok? Genero guztietako titulu interesgarriak, ez zaitezte arduratu.

Enpresa handiek bigarren mailako tituluak izango liratekeenak kaleratzeko egunak dira, bat kenduta: Ubisoft-ek bere etorkizuna jokoan dauka Assassin’s Creed Shadowsekin. Nintendo zein Xbox ikusiko ditugu birmasterizazioekin —berdeen kasuan, PS5erako!—, eta indie obra interesgarriren bat edo beste jokatzeko aukera ere egongo da egunotan.

 

Age of Mythology: Retold

  • Argitaratze data: 2025-03-04
  • Garatzailea: Xbox Game Studios
  • Generoa: Estrategia
  • Plataformak: PlayStation 5

Duela hilabete batzuk PCko eta Xboxeko bertsioak jaso ondoren, Age of Mythology mitikoaren birmasterizazio itxurosoa PS5era iritsiko da. Aginteentzako euskarriarekin dator kondairetako zibilizazioen arteko denbora errealeko estrategia borrokak proposatzeko.

Egun berean, gainera, espantsio berria ikusiko dugu AoM-n: Immortal Pillars-ek txinatar heroiak eta jainkoak gehituko dizkio obra klasikoari.

 

Split Fiction

  • Argitaratze data: 2025-03-06
  • Garatzailea: Hazelight Studios / EA
  • Generoa: Abentura
  • Plataformak: PC, PS5, Xbox Series

Hazelight taldearen titulu berriak aurreko It Takes Two eta A Way Out zoragarrien bide berbera jarraitzen du: bi jokalarirentzako abentura kooperatiboa da Split Fiction.

Oraingoan fantasiazko nahiz zientzia fikziozko mundu birtualetan murgilduko gara plataformak, puzzleak, tiroketak eta akziozko eszena bizitzeko. Jokalari bakar batek jokoa erosita edukitzea nahikoa da, gainera, lagun bati jokatzera gonbidatzeko.

 

Wanderstop

  • Argitaratze data: 2025-03-11
  • Garatzailea: Ivy Road
  • Generoa: Abentura, nekazaritza simulagailua
  • Plataformak: PC, PS5

The Stanley Parable maitatuaren Davey Wreden garatzailearen lana da Wanderstop. Girotzez guztiz aldatzen du, nekazaritza magiarekin elkartzen duen mundu koloretsua aurkezteko.

Te denda kudeatzeko beharrezkoak biltzen ariko gara Alta protagonistarekin. Sekretu bat dauka tartean, baina: gerlaria izandakoa da… eta bizitza horretara itzuli nahiko luke. Horrela, simulagailu mekanikak narratiba sakonarekin biltzen ditu bideojokoak. Demoa proba dezakezue Steam bidez.

 

Assassin’s Creed Shadows

  • Argitaratze data: 2025-03-20
  • Garatzailea: Ubisoft
  • Generoa: Abentura, akzioa
  • Plataformak: PC, PS5, Xbox Series

Japonian girotutako AC desiratua dator, azkenik. Bi protagonistarekin ariko gara Shadowsen: Naoe ninja eta Yasuke samuraia kontrolatuko ditugu Erdi Aroko mundu irekiko Japonian.

Bideojokoak hainbat berandutze eduki ditu; tartean, season pass modeloa alboratzea erabaki dute egileek. Geroratzeekin prestatzen ari diren mundu aberatsa fintzeko aprobetxatu dutela dirudi, azken bideoek sekulako maila erakusten baitute. Laster probatuko dugu.

 

Xenoblade Chronicles X: Definitive Edition

  • Argitaratze data: 2025-03-20
  • Garatzailea: Monolith Soft / Nintendo
  • Generoa: JRPG
  • Plataformak: Switch

Nintendo Wii U kontsolako JRPGrik handienetakoak Switch bertsioa izango du. Xenoblade Chronicles Xn mecha robot erraldoiak, esploratzeko mundu zabala eta denbora errelako borroka taktikoak ikusiko ditugu.

Definitive Edition gaurkotuak denetariko hobekuntzak gehituko dizkio: atal teknikoa txukuntzeaz gain, bizitza kalitate aldaketekin nahiz istorioarentzako espantsioarekin etorriko da.

 

Cataclismo

  • Argitaratze data: 2025-03-20
  • Garatzailea: Digital Sun
  • Generoa: Estrategia
  • Plataformak: PC

Bartzelonako Digital Sun taldeak iaztik aurretiazko sarbidean dagoen Cataclismo dorre defentsa jokoaren 1.0 bertsioa argitaratuko du. Gotorlekuak eraikitzea, eta, ondoren, hauek babestea izango da gure helburua.

Early access fasean balorazio aski positiboak jaso dituzte jokalarien aldetik. Behin betiko bertsioarekin kanpaina osoa, biziraupen moduarentzako aldaketa handiak, mekanikak bereziak dituen bioma eta askotariko bizitza kalitate hobekuntzak zein akats zuzenketak prestatu dituzte.

 

Bleach: Rebirth of Souls

  • Argitaratze data: 2025-03-21
  • Garatzailea: Tamsoft Corp / Bandai Namco
  • Generoa: Borroka
  • Plataformak: PC, PS5, PS4, Xbox Series

Ichigo Kurosaki shinigami-aren abenturak bogan dira berriro animearen azken atalei esker. Horiekin batera jasoko dugu Rebirth of Souls borroka joko interesgarria: anime fighter-en ohiko duelu sinpleak elementu interesgarriekin nahastuko ditu.

Cel shading estetikarekin, manganimeko pertsonaia sorta zabala eskainiko digu: Ichigo, Aizen, Urahara, Stark, Ikkaku, Kyoraku, Orihime, Rukia, Byakuya, Genryusai eta askoz gehiago ikusiko ditugu.

 

Atomfall

  • Argitaratze data: 2025-03-27
  • Garatzailea: Rebellion
  • Generoa: RPG, tiro jokoa
  • Plataformak: PC, PS5, PS4, Xbox Series, Xbox One

Sniper Elite arrakastatsuen estudioak bigarren mundu gerra atzean utzi, eta Erresuma Batuan girotutako lehen pertsonako RPG bitxia proposatzera dator. Fallout edo S.T.A.L.K.E.R. bezalakoengandik hainbat elementu hartuta, gerra nuklear osteko mundu misteriotsua ezagutuko dugu.

Esplorazioa, tiroketak, hizketaldiak… mundu aberatsa izango da Atomfallena. Tartean artisautza ezaugarri nabarmenak egongo direla adierazi dute egileek: gure ekipamendua sortzen ibiliko gara bildutako baliabideekin.

 

The First Berserker: Khazan

  • Argitaratze data: 2025-03-27
  • Garatzailea: Neople / Nexon
  • Generoa: ARPG
  • Plataformak: PC, PS5, Xbox Series

Dungeon Fighter Online bideojokoen unibertsoan girotutako soulsborne abentura dugu The First Berserker: Khazan. Berrindartutako Khazan jeneralan bilakatuko gara, mendeku bila.

Fantasiazko mundu aberatsa eta borroka latzak agintzen ditu tituluak. Mailaz igotzeaz eta gure abileziak hobetzen ariko gara; ez hori bakarrik, ekipamendu hobea aurkituko dugu gure abenturetan, armategi zabala barne. Anime estiloko cel shading estetikak ez zaitzala engainatu: joko odoltsuaren aurrean zaude.