PlayStation Store saltokian filtratu da eguna. MGS3: Snake Eater maisulanaren berregitea da.

Metal Gear Solid Delta: Snake Eaterren argitalpen data aurreratuta ikusi dugu: filtrazio baten arabera, abuztuaren 28an kaleratuko da Naked Snake espioiaren abentura.

Ez da edonolako filtrazioa izan: PlayStation Store saltokian agertu da —albistea idazterako unean datak bertan jarraitzen du—, eta trailer berria ikusteko aukera ere eduki dugu.

Metal Gear Solid 3: Snake Eater ikaragarriaren berregitea da MGS Delta. Sagaren hastapenak ezagutu genituen 2004ko PlayStation 2ko abenturan; Big Boss, edo, hobe esanda, Naked Snake espioiak Snake Eater misioari ekingo dio bertan.

Gerra Hotza, isilpea, tiroketak eta arerio harrigarriak elkartu zituen Hideo Kojima zuzendariaren lanak. Berregitea Kojimarena ez bada ere, oinarri guztiak mantendu dituztela dirudi, atal grafikoa goitik behera eraberrituta.

Filtratutako bideoan Ocelot, EVA, Volgin, The Boss eta beste hainbat aurpegi ezagun ikus ditzakegu, baita orain arte erakutsi gabe eduki dituzten akziozko eszenak ere. Shagohod ibilgailuarekiko ihesaldia ageri da, besteak beste, COBRA unitateko etsaiekin batera.

Zaleek eskatzen zuten eduki bat itzuliko dela jakin dugu, gainera: Ape Escape sagarekin lotutako Snake vs Monkey minijokoa bueltan da berregitean.

Metal Gear Solid Delta: Snake Eater PC, PlayStation 5 eta Xbox Series plataformetan kaleratuko da abuztuaren 28an.

 

Eta filtrazio hau, nondik?

PlayStationi ihes egin dion data hau datorren astean ezagutu behar genuela uste da. Izan ere, hainbat iturrik State of Play aurkezpena aurreratu dute otsailaren 14rako: trailerra PS5eko bertsioarena dela ikusita, bertarako gordetzen zebiltzala dirudi.

Hortaz, dena ondo badoa, datozen egunotan PlayStationek State of Play emanaldia iragarriko du.