Lehenak otsailaren 17an iritsiko dira. Beranduago, sekula argitaratu gabeko bi bideojoko helduko dira; horien artean, F-Zero joko bat. Jokatzeko kaskoak behar dira.

Nintendok Virtual Boy gailuko hamasei bideojoko berpiztuko ditu. Switch kontsoletako Nintendo Classic zerbitzura iritsiko dira: 3D kaskoen hamasei titulu jasoko ditu.

Frankizia handiak eta pertsonaia ezagunak ikusiko ditugu horietan: Wario bihurria, Tetris partidak edo Shin Megami Tensei / Persona sagetako Jack Frost eta Jack-o-Lantern maitatuak igaro ziren Virtual Boytik.

Otsailaren 17an ikusiko dituzte lehen jokoak Nintendo Switch Online + Expansion Pack-en harpidedunek. Hemen zerrenda:

  • Teleroboxer
  • Galactic Pinball
  • Red Alarm
  • Golf
  • Virtual Boy Wario Land
  • 3-D Tetris
  • The Mansion of Innsmouth

Jokatu ahal izateko, harpidetzaz gain, Switch 1 edo Switch 2 kontsolarekin batera erabiltzeko hardware berezia erosi beharko da; Virtual Boy kaskoen bertsio berria, alegia.

Bi modelo desberdin merkaturatuko dituzte japoniarrek. Alde batetik, 80€ balioko dituen VB kaskoen erreplika; bestetik, jokatzeko balioko duten 20€-ko kartoizko betaurreko xumeagoak.

2026a bukatu aurretik beste hainbat joko helduko dira zerbitzura:

  • Mario Clash
  • Mario Tennis
  • Jack Bros
  • Space Invaders Virtual Collection
  • Virtual Bowling
  • Virtual Force
  • V-Tetris

Gainera, beste bi bideojoko nabarmendu dituzte Nintendokoek. Kasu oso bereziak dira, ez baitira inoiz kaleratu; are gehiago, bide ez ofizialetatik jokatzea ere ezinezkoa izan da. Lehena F-Zero lasterketa jokoen sagako titulua da; bigarrena, Intelligent Systems taldearen —Fire Emblem sagaren edo Paper Mario-ren arduradunak, besteak beste— lana. Hauek ere aurten estreinatuko dira:

  • Zero Racers
  • D-Hopper

Ez da antzekoa egiten duten lehen aldia: Super NES Classic Edition gailuarekin 1995. urtean garapena amaitutako, baina argitaratu gabe utzitako Star Fox 2 kaleratu zuten.

Urte berean merkaturatu zen, hain zuzen, Virtual Boy gailua. 3D betaurrekoak porrot hutsa izan ziren Nintendorentzat: guztira 800.000 gailu baino gutxiago saldu omen zituzten, merkatutik desagerrarazi arte.

Otsailaren 17an itzuliko dira Virtual Boy hardwarea eta bere bideojokoak.