Mario Kart World jokoarekin bilduko dute edizio berezian. Erreserbak apirilaren 8an abiatuko dituzte.

Nintendo Switch 2aren data eta prezioa iragarri ditu Nintendok azken Direct emanaldi berezian. Ekainaren 5ean estreinatuko da N handiaren kontsola berria, eta 469,99 eurotan erosi ahalko da.

Oinarrizko edizioaren prezioa da arestian aipatutakoa; izan ere, Mario Kart World berriaren batera ere salduko dute, jokoa digitalki eskainita, 509,99 eurotan.

Errerserbak apirilaren 8an irekiko dituztela aurreratu dute japoniarrek. Bideojokoen prezioari dagokionez, Mario Kart World 90 eurotan salduko dute fisikoan; digitalean, berriz, 80 euro balioko ditu.

 

Xehetasun guztiak

Aurkezpen luzea izan da, ordubetekoa, eta hardwareari zein softwareari buruzko xehetasun eta gako guztiak eskaintzeko balio izan die Nintendokoei.

Kontsola hibridoaren aurrean gaude berriz: modu eramangarrian erabil dezakegu, baita bigarren pantaila bati konektatuta ere. Gailuaren pantaila 7,9 hazbetekoa izango da: bere horretan, 1080p-ko bereizmena eta segundoko 120 irudiko tasa eskainiko ditu pantailak. LCDa izango da, hori bai, baina HDR euskarria edukiko du.

Dock ofizialera konektatuta, ordea, 4K bereizmeneraino iritsiko da Switch 2a, 60 fps-ko tasarekin batera.

Joy-con aginteak dira beste protagonistetako bat. Zurrumurru guztiak baieztatu dira: magnetikoki konektatuko dira Switch 2ra —lasai, ondo eutsiko dutela diote japoniarrek—, eta sagu bezala erabili ahalko dira, giroskopioarekin batera denetariko funtzionaltasunak ahalbidetuta. Palanken zein SL eta SR botoien tamaina areagotu dutela azaldu dute arduradunek, joy-con originalen inguruko kexei erantzunez.

Biltegiratzeari dagokionez, 256 GBeko memoria eman diote Switcharen oinordekoari; originalak 32 GBeko biltegiratzea zeukan.

Berritasunik esanguratsuenetakoa C botoi misteriotsuari lotutakoa da. Bai, “komunitatearen botoia” dela esan dezakegu: ahots zein bideo txata, jokoa partekatzeko aukerak eta askoz gehiago eskainiko dizkigu. Kontsolaren mikrofonoa erabil dezakegu hitz egiteko; gure bideoa partekatzeko, baina, Nintendoren web kamera ofiziala erosi beharko dugu.

GameShare izeneko ezaugarriarekin tokiko multijokalarirako pentsatutako bideojokoak sarera eramango ditugu. Steam Remote Play Together bezalako ezaugarrien antzekoa, joko bakarra beharko dugu etxeko zein kanpoko lagunekin multijokalarian aritzeko.

Nintendo Switch 2 Pro Controller agintea ere ikusi dugu. Aurrekoaren antzeko diseinuarekin, bi botoi berri dauzka atzealdean: ez dakigu hauek konfiguratzerik izango dugun.

 

Switch 1eko jokoak hobetuz

Retrobateragarritasuna izan da jorratutako beste gaietako bat. Switch originalaren joko gehienak erabili ahalko ditugu Switch 2an, baina, kasu zehatz batzuetan, hobetutako bertsioak ikusiko ditugu. Super Mario Party Jamboree, The Legend of Zelda: Breath of the Wild zein Tears of the Kingdom eta Kirby and the Forgotten Land askotariko berritasunekin gaurkotuko dituzte.

Mario Partyren eta Kirbyren kasuan, eduki berriak ikusiko ditugu: Switch 2aren funtzionalitate berriak erabiltzen dituen minijokoak datoz Jamboreerentzat, eta mundu berria dakarren espantsioa Kirbyrentzat.

Zelden kasuan, hobekuntza teknikoak dira azpimarragarrienak: bereizmena zein segundoko irudien tasa hobetuko dituzte.

Tamalez, aipatutakoak Switch 2an erabiltzeko ordaindu egin beharko dugu: eguneratzeak edo DLCak ordainpekoak dira, kasu guztietan.

Nintendo Switch 2 kontsola ekainaren 5ean merkaturatuko da.