Lander Unzueta
Urrian estreinatzeko asmoa agertu zuen Moon Studios-ek: geroratzeak kritika handiak eragin ditu erabiltzaileen aldetik.
No Rest for the Wicked berandutzeko erabakia jakinarazi du Moon Studios talde independenteak. 2027ko martxoan argitaratuko da azkenik 1.0 bertsioa.
Ekainean iragarritako data nabarmen geroratu da, modu horretara: urrian estreinatzeko asmoa agertu zuten ordu hartan. Aurretiazko sarbidean jarraituko du martxora arte: 2024ko apirilean abiatu zuten early access fasea, ordu hartatik hona hainbat eguneraketa kaleratuta.
Taldetik adierazi dutenez, “jokagarritasunaren errendimendua hobetzeko, maila sistema fintzeko eta jokoak behar dituen oinarrietarako txukuntzeko” erabiliko dute garapen denbora gehigarria. Beta itxiak ere abiatuko dituzte laster, abenduan beta irekia bideratzeko.
Erabakiak kritika nabarmenak eragin ditu jokalarien artean. Jokoa estreinatu aurretik erosten zutenek Founders Pack deitutako eduki gehigarria jasoko dutela iragarri zuten aldez aurretik; ez hori bakarrik, 1.0 bertsioarekin prezioak gora egingo duela ere aldarrikatu zuten egileek. Erabiltzaileek adierazpenok eta urriko data jokoaren salmentak sustatzeko zabaldu zituztela diote, No Rest for the Wicked oraindik kaleratzeko prest egon gabe zegoela ondo jakinda.
Bitartean, Thomas Mahler jokoaren zuzendariak polemika artean jarraitzen du bere adierazpenen ondorioz. VideoGamesCritic deitutako webgunea prestatu du: OpenCritic edo MetaCritic bezalako analisien eta balorazioen webgune ezagunekiko erantzuna da, hauen notak “ez direla fidagarriak” adierazita. Jokalarien aldetik analisi bonbardaketa (review bombing) jaso izana salatu zuen iaz, kexak egiazkoak ziren arren.
Soulslike estiloko bideojokoa prestatzen dabiltza No Rest for the Wickedekin. Borroka zailak, fantasia ilunezko mundu itxurosoa, abentura kooperatiboak eta gehiago agintzen ditu tituluak. Itxura erakargarria badu ere, arazo teknikoek eta garapen geldoak kexa ugari eragin dute aurretiazko sarbidea ordaindu dutenen artean: berandutzeak ez du horrekin lagundu.
Ez badago aldaketarik, 2027ko martxoan estreinatuko da No Rest for the Wickeden behin betiko bertsioa. PCra eta PlayStation 5era iritsiko da lehenik; beranduago, Xbox Series eta Switch 2 edizioak ere argitaratzeko asmoa daukate Moon Studioskoek.
Iruzkinak