Legends berria lehen aldiz ikusi dugu mugimenduan. Champions borroketara bideratutako jokoa da: Switch-ean zein mugikorretan ikusiko dugu.

The Pokémon Company, Nintendo eta Game Freak taldeek Pokémon Eguna ospatu dute urteroko Presents aurkezpenarekin. Bi bideojoko nabarmendu dira emanaldian: Pokémon Legends: Z-A zein aurkeztu berri duten Pokémon Champions.

Iaz ezagutu genuen Legends: Z-A espero genuena izango da. Kalos eskuladeko Lumiose City hirira bidaiatuko dugu oraingoan, Legends: Arceus-ko iragana alboratuta, baina ideiak mantenduta. Denbora errealeko mekanikak ikusiko ditugu berriro: adibidez, piztiak harrapatzerakoan guk jaurtiko ditugu pokéball-ak.

Hasierako pokémonak aspalditik ezagutzen ditugu: Chikorita, Tepig eta Totodile artean aukeratuko dugu abentura hasterakoan. Megaeboluzioak itzuliko direla baieztatu dute arduradunek; horrela, batailetan gure piztien indartutako bertsioak erabili ahalko ditugu.

Dueluei dagokienez, espazioa zeharo garrantzitsua da Legends: Z-An. Izan ere, piztien mugimenduek irisgarritasun desberdina edukiko dute, eta gure pokemonaren zein aurkariaren kokalekua kontuan hartzea ezinbestekoa da.

Lumiosen era guztietako pertsonaiak ezagutuko ditugu; itxura batean, hirian bakarrik ibiliko gara, baina gune basatiak ere edukiko ditu. Hauetan aurkituko ditugu sakelako munstro basatiak.

Argitalpen data zehaztu gabe jarraitzen dute: 2025 bukaerarako jasoko dugula diote. Switch originalean kaleratuko da, baina, nola ez, oraindik estreinatzear dagoen Switch 2an ere jokatu ahalko dugula suposatzekoa da.

Zuzenekoaren ustekabeko handia, berriz, Pokémon Champions izan da. Game Freak prestatzen ari da The Pokémon Works taldearekin batera —ILCA, alegia—. Pokémonen filtrazio Synapse proiektua bezala ezagutu genuen Champions.

Nintendo Switcherako argitaratzeaz gain, Android zein iOS gailu mugikorretan ere jokatu ahalko dugu. Pokémon arteko borrokak dira ardatza, Stadium edo Colosseum ataletan bezala, baina oraingoan sare bidezko dueluak dira nagusi.

Megaeboluzioak eta terastalizazioa batera erabiltzeko aukera egongo dela dirudi; ondorioz, agian dynamax zein z-mugimenduak ere batuko dituztela pentsa daiteke.

Joko barneko piztiak erabiltzearekin batera, zelan ez, gure Pokémonak eraman ditzakegu Pokémon Home bidez: Scarlet, Violet edo GO bezalako tituluetan harrapatutako munstroekin jokatuko dugu obra berrian.

Garapena luzerako doala dirudi, zoritxarrez: ez dute merkaturatze datarik zehaztu.