Asus eta Microsoft enpresen eskuko PCak sortzeko akordioaren emaitza dira. Bi modelo egongo dira, baina ez dute preziorik zehaztu.

ROG Xbox Ally PCen merkaturatze data jakitera eman du Microsoftek. Urriaren 16an estreinatuko dira ROG Xbox Ally eta ROG Xbox Ally X gailuak.

Eskuko ordenagailuak Microsoften zein Asusen arteko elkarlanetik jaio dira. Hala eta guztiz, ere, 2023an Asusek kaleratutako Asus ROG Ally gailuaren bertsio berria direla esan daiteke, nahiz eta Microsoftek Xbox kontsola dela adierazi duen behin eta berriz marketing kanpainan. Horri lotuta, hainbat kritika jaso dituzte zaleen aldetik, Xbox kontsoletako jokoek ez baitute funtzionatzen ROG Xbox Allyetan.

Steam Deck-aren antzeko eskuko PCa da, beraz. Windows 11 sistema eragilearekin funtzionatuko dute ROG Xbox Allyek: zehazki, bideojokoetara bideratutako bertsio berezia erabiliko dute, bigarren planoan dabiltzan aplikazio ugari desaktibatuta errendimendua areagotzeko eta kontsumoa murrizteko.

Pantaila txikien aurrean gaudenez, Xboxekoek eskuko gailuen bateragarritasun programa (Handheld Compatibility Program) izeneko ekimena abiatu dute garatzaileekin batera, etorkizuneko bideojokoak eskuko PCetan jokatzeko egokiak izan daitezen bermatzeko.

Deck Verified plataformaren antzera, jokoak eskuko gailuarentzat optimizatuta dauden adieraziko da —aginteen euskarria duten, testuak eta menuak irakurterrazak diren, bereizmen aukera egokiak dituzten, etab.—, eta, ez bada horrela, doikuntzetan egin beharreko aldaketak zehaztu.

Gainera, shader-ak automatikoki jaitsiko eta inplementatuko dira bideojokoetan. Steamen gailuak egin antzeran, lehen partidetako errendimendua areagotzeko zein bateria erabilera hobetzeko balioko du, izozteak eta testuren edo efektuen kargak bizkortuz.

Bi gailuak 7 hazbeteko LCD 1080p/120Hz pantailarekin, Wi-Fi 6E nahiz Bluetooth 5.4 konektibitatearekin eta 65W-eko kargagailua daukan dock-arekin merkaturatuko dituzte. Alde batetik, oinarrizko ROG Xbox Allyak AMD Ryzen Z2 A prozesadorea erabiliko du, 16GB RAM memoriarekin eta 512GB SSD biltegiratzearekin; beste aldetik, ROG Xbox Ally Xk AMD Ryzen AI Z2 Extreme prozesadorea, 24GB RAM eta TB 1eko SSD biltegiratzea batzen ditu.

Kaleratze data eta ezaugarriak ezagututa, azken misterio handia argitu behar dute fabrikatzaileek: prezioa. Zurrumurruen arabera, ROG Xbox Ally gailua 600 euroko prezioan estreinatuko litzateke; 900 eurotan, bestalde, ROG Xbox Ally X. Gailuen estreinaldiaren aurretik, urriaren 16a baino lehen, ezagutu beharko genituzke prezioak.