Returnal roguelike-arekin antzekotasun handiak edukiko dituela dirudi. 2026an estreinatuko da PS5ean.

Housemarque eta PlayStation etxeek Saros aurkeztu dute State of Play emanaldian. Hirugarren pertsonako akziozko abentura izango da.

Estudio finlandiarraren aurreko jokoaren ideia berbera jarraituko duela dirudi: Returnal maisulanean gertatzen zen modura, planeta oldarkor batean harrapatuta egongo gara. Sekretuak argitu ahala dozenaka estralurtar munstroren aurka ariko garela pentsa daiteke.

Carcosa kolonia bisitatuko dugu oraingoan. Eklipse misteriotsupean dagoen planeta da. Arjun Devraj soldaduan bilakatuko gara, “bilatzen ari den pertsona aurkitu arte geldiezina den Soltari soldadu boteretsua”. Rahul Kohli aktoreak jartzen dio aurpegia.

Roguelike eta bullet hell oinarriekin jarraituko dute Housemarquekoek; hori bai, oraingoan “baliabide eta jarraipen iraunkorrak” ikusiko ditugula nabarmentzen dute. Returnalen betirako gordetzen genituen ahalmenak eta bestelakoak desbloketazen genituen, baina Sarosen biltzen dugun guztiarekin aurrera egingo dugula dirudi partida bukatzerakoan.

PlayStation Studios-ko kideen arabera, “taldearen amestutako proiektua” da aurkeztutako titulua, eta hori eratzeko ere “ikaragarrizko estudioa” prestatu dutela diote. Aurreko Returnal ikaragarri gustatu zitzaigun Game Erauntsian. Hauxe adierazi genuen gure analisian:

Akzio bizia eta gogorra, erotzeko atal grafikoa eta ordu luzeak eskaintzen dituen titulua da estudio finlandiarrak sortutakoa.

Saros 2026an kaleratzeko helburua dute Housemarquekoek. PlayStation 5erako bertsioa baino ez dute iragarri oraingoz.