Lizardcube garatzailea Streets of Rage 4rekin egindakoa errepikatzera dator abuztuaren 29an.

Samuraiak eta ninjak berriz modan daudela dirudi. Sega-k Shinobi: Art of Vengeance aurkeztu du State of Play aurkezpenean: run and gun saga mitikoa berpiztera datoz.

Lizardcube arduratuko da ninjen atal berria sortzeaz. Gogoan baduzue, Streets of Rage 4 bikaina —hemen gure analisia— garatu zuten 2020an; Shinobi berriak horren atal grafikoa bereganatuko du xehetasunez betetako sprite-ekin.

Joe Musashi ninjan bilakatuko gara berriz bi dimentsiotako abenturan ezpatakadaka eta saltoka aritzeko. Plataforma erronkak biderkatu direla dirudi: hormetatik zein sabaitik ibiliko gara oraingoan arerioen tiroak zein bestelako oztopoak saihesten ditugun bitartean.

Surf taula gaineko mailak itzuliko direla ikus daiteke bideoan, baita buruzagien aurkako borrokak ere. Nola ez, pantailako etsai guztiak akabatuko dituen magia boteretsuak erabiliko ditu gure protagonistak.

Abuztuaren 29an PlayStation, Xbox, Switch zein PC plataformetan estreinatuko da Shinobi: Art of Vengeance.