The Elder Scrolls V: Skyrim erabilita laugarren Oblivion abentura berregingo dute, berritasunak gehituta. Duela 11 urte hasi ziren garapenarekin.

Skyblivion mod proiektuaren berriak eskaini ditu TESRenewal zale taldeak. Garapen prozesua aurreikusitako moduan doa: 2025ean eraldaketa erraldoia argitaratzeko helburua mantentzen dute.

Proiektuak The Elder Scrolls V: Skyrim hartzen du oinarritzat. Hala ere, xedea aurreko atala berreraikitzea da, TES IV: Oblivion maitatua. Bosgarren jokoaren Creation Engine motor grafikoa erabilita laugarrena berregitea, laburbiltzearren.

Emanaldi berezia eskaini du 50 bat garatzaile baino gehiagoz osatutako zaleen komunitateak, azken urteotan prestatutakoak aurkeztuz zein proiektuaren etorkizunari buruzko zalantzak argituz. 2023an adierazi bezala, 2025ean proiektuaren behin betiko bertsioa bukatutzat ematea bilatzen dute. Data zehaztu gabe jarraitzen dutenez, urte amaieran ikusiko dugula pentsatu nahiko genuke.

Duela 11 urte ekin zioten garapenari: hasiera batean Oblivionen port-a eratzeko asmoa baino ez zegoen; 2016an, ordea, berregitea prestatzen hasi ziren, eta ordutik hona denetariko hobekuntzak inplementatu dituzte. Cyrodiil eskualde koloretsura itzuliko gara, hortaz, baita Oblivioneko infernura ere, 223 misio bizitzeko. Zazpi eskualdeetan sakabanatutako hiriak eta herriak berreginda ikusiko ditugu, gune klasikoak eta berriak uztartuz.

Mapa eraberritua zeharkatzearekin batera eguneratutako mekanikak aurkituko ditugu, mailaz igotzeko aukeretatik hasita. Are eduki gehiago sortu dituzte, baina: joko originalean ikusi gabeko misio eta ezaugarri berriak aurkituko ditugu Skyblivionen. Soinu banda, eguraldi sistema zaharberritua, NPCak, tokiak… eduki ugari ezagutuko ditugu modarekin. Bizi kalitate hobekuntzak barne, noski.

Bitartean, aurten TES IVren berregite ofiziala ikusiko dugula diote zenbait iturrik. Xbox-ek eta Bethesda-k ez dute ezer iragarri oraingoz, baina, egitekotan, datozen asteotan ezagutuko genuke.

Skyblivion dohainik eskainiko dute bukatuta dagoenean; Skyrim erosita edukitzea nahitaezkoa izango da, ordea, moda erabili ahal izateko. 2025ean ikusiko dugu, dena ondo badoa.