Eguneraketa erraldoiarekin batera kaleratuko da. 2017tik joka dezakegu PCan: sekulako notak eskuratu ditu Team D-13ren jokoak.

Nintendo Switcheko jokalariek Star of Providence jasoko dute otsailaren 20an. Bigmode argitaletxeak —Dunkey eduki sortzailearena, bide batez— jakitera eman duenez, berritasun interesgarriekin eramango dute gailu hibridora.

Izan ere, Team D-13 taldea Into Oblivion izeneko eguneratzea prestatzen aritu da. Tiro infernu (Bullet Hell) eta roguelike generoak batzen dituen indie bikainaren edukiak biderkatuko ditu.

2017an estreinatu zen Star of Providence ordenagailuetan: ordutik hona, ehundaka jokalari maitemintzea lortu du, Steam plataforman aparteko balorazioak eskuratuta.

Sei espazio ontzi desberdin gidatuko ditugu gelaxka arriskutsuetan. Gure helburua: aspaldi ahaztutako lantegi misteriotsuan zehar aurkituko ditugun 120 bat arerio mota desberdin garaitzea, euren tiro samaldak saihesten ditugun bitartean. Arkade jokagarritasunarekin, eraldatzaileekin gure ontziarentzako nahiz armentzako denetariko hobekuntzak bilduko ditugu partidetan garaipenari errazago heldu ahal izateko.

Aipatutako Into Oblivion doako DLCa berria da, baina jokoak aldez aurretik Relics of the Past eduki gehigarria jaso zuen, ostean debalde banatzeko: honek ere arerioak, armak, hobekuntzak, gelak eta askotariko aldaketak nahiz berritasunak inplementatu zizkion dagoeneko edukiz beteta zetorren tituluari.

Star of Providence otsailaren 20an merkaturatuko da Switchean; PCko jokalariek Steam bidez eskura dezakete.