40 minutu baino gehiago iraungo ditu bideojokoen ekitaldiak. Nazioarteko estudioen jokoak bilduko dituzte.

PlayStationek otsaileko State of Play aurkezpena baieztatu du. Bihar bertan jarraitzeko aukera egongo da.

23:00etan hasiko da: YouTube zein Twitch kateen bidez jarraitu ahalko dugu. 40 minutuak gaindituko dituzte emanaldiarekin; hori bai, ez dituzte erakutsiko dituzten bideojokoak zehaztu.

Zurrumurruek aspalditik aurreratu izan digute, eta, urtero lez, SoPean PlayStation kontsolatan etorkizunean argitaratuko diren jokoak ezagutzera emango dituzte. Nazioarteko estudioen tituluak batzeko asmoa agertu du enpresa japoniarrak. Baina, zeintzuk dira zurrumurruak eta filtrazioak?

Argiena Metal Gear Solid Delta: Snake Eater da. Joan den astean PlayStationi ihes egin zion Konami-ren bideojokoaren bideoak, eta PS Store saltokian argitalpen data argitaratu zuten: abuztuaren 28an estreinatuko da. Bideo hura berriz ikusiko dugu ziurrenik, baina, agian, bestelako berritasunak ere eskainiko dituzte MGS3 maisulanaren berregitearen inguruan.

Beti gure inguruan bueltaka dabilen beste joko bat da, zelan ez, Bloodborne. Martxoan 10. urteurrena beteko du FromSoftware eta Japan Studio garatzaileen obra maitatuak, eta, zorte askorekin, birmasterizazioren edo berregiteren bat ikus dezakegu.

God of War da sarean zabaldutako beste saga bat. Diotenez, Kratos-en lehen abenturen bilduma etor daiteke gaur egungo plataformetarako: lehen hiru joko handiak nahiz PSP eramangarriko tituluak batuko omen ditu.

Bihar bertan jakingo dugu zurrumurruak egia diren edo ez. Esan bezala, 23:00etan hasiko dute State of Play zuzenekoa.